Tension para klasikes Barcelona – Real Madrid (nesër, 22:00). Klubi madrilen ka vendosur pak para orës 19:00 që të bëjë një shpërfillje totale ndaj Federatës Spanjolle të Futbollit.
Presidenti Florentino Perez ka urdhëruar drejtuesit që të anulojnë eventet e planifikuara për finalen e Kupës së Mbretit. Ancelotti dhe Modric duhej të dilnin para mediave në një konferencë për shyp, kurse skuadra duhej të stërvitej në La Cartuja. Asnjë nga këto nuk ndodhi.
Jo vetëm kaq, por klubi vendosi që askush të mos merrte pjesë në darkën zyrtare për finalen e shumëpritur me Barcelonën. Askush nga klubi i bardhë nuk do të marrë pjesë.
Real Madrid ka vendosur të mos marrë pjesë në asnjë nga eventet zyrtare të Federatës, duke argumentuar se ata kanë dyshime mbi arbitrat që gjykojnë kundër Real Madridit, të përcaktuar nga Federata – sipas pretendimeve – me plane kundër “Los Blancos”. Gjyqtari i caktuar për këtë sfidë, Ricardo De Burgos Bengoetxea, ka qarë në një dalje për shtyp pas presionit që ai thotë se ka pësuar nga madrilenët.
Në media është raportuar se nuk përjashtohet mundësia që Real Madrid të refuzojë të luajë nesër kundër katalanasve. m.p.
