Kryeministri izraelit, Benjamin Netanyahu, shprehu ngushëllimet e tij për Kishën Katolike për vdekjen e Papës Françesku në një postim në rrjetin social X.
“Shteti i Izraelit shpreh ngushëllimet e thella për Kishën Katolike dhe për komunitetin katolik në mbarë botën për vdekjen e Papës Françesku. Qofshin në paqe”, shkruan Netanyahu në mesazhin e tij të thjeshtë në anglisht, të cilin e publikoi mbrëmë, të enjten, në llogarinë e zyres së kryeministrit.
Izraeli do të përfaqësohet në funeralin e Papës nesër, të shtunën, nga ambasadori i tij në Vatikan, Yaron Sidman.
Ky është mesazhi i parë nga kryeministri izraelit pas njoftimit të vdekjes së Papës Françesku të hënën.
Presidenti izraelit, Isaac Herzog, ishte një nga të parët zyrtarë në botë që reagoi atë ditë për vdekjen e Papës, duke e cilësuar si “një njeri me besim të thellë dhe dhembshuri të pakufishme”.
Që atëherë, as Netanyahu dhe as ndonjë nga ministrat e tij kryesorë nuk kishin shprehur publikisht ngushëllime për vdekjen e Papës, i cili konsiderohej gjerësisht në Izrael si një mbështetës i pozitave pro-palestineze.
Derisa vdiq, Papa Françesku kishte intensifikuar kritikat e tij për luftën në Gaza. Në mesazhin e tij për Pashkë, ai theksonte “situatën dramatike humanitare” në enklavën palestineze./E.S
