Pas skandalit të dhunës ku ishte i përfshirë kandidati për deputet i PD-së në zonën e Dibrës, Xhelal Mziu, policia bën me dije se ka referuar në SPAK materialet eedhe punonjësin e njësisë administrative Ostren, 33-vjeçarin Kalosh Murra. Ky i fundit akuzohet për veprën penale “Pengimi i subjekteve zgjedhore”.
Sipas njoftimit të bluve, ndaj Murrës është bërë një kallëzim nga Mziu, i cili pretendon se gjatë takimit elektoral të zhvilluar nga subjekti politik “Partia Demokratike”, në fshatin Ostren, shtetasi 33-vjeçari, indimidonte pjesëmarrësit në takim.
“Specialistët për Hetimin e Krimeve të Komisariatit të Policisë Bulqizë referuan materialet në SPAK, për veprën penale “Pengimi i subjekteve zgjedhore”, për shtetasin K.M., 33 vjeç, banues në Shupenzë, pasi ndaj tij me datë 25.04.2025, ka bërë kallëzim shtetasi Xh. M., 58 vjeç, banues në Tiranë, i cili pretendon se gjatë takimit elektoral të zhvilluar nga subjekti politik “Partia Demokratike”, në fshatin Ostren, shtetasi K.M., indimidonte pjesëmarrësit në takim”, njoftoi Policia.
Në skandal është përfshirë kandidati për deputet i PD në zonën e Dibrës, Xhelal Mziu, i cili pas një takimi elektoral në Ostren, ka dhunuar fizikisht së bashku me nipin e tij me iniciale E. M., punonjësin e njësisë administrative Ostren, 33-vjeçarin Kalosh Murra.
E gjitha ka ndodhur në mesditë rreth orës 13:00 pasi ka përfunduar takimi elektoral i organizuar nga Partia Demokratike në Ostren./E.S
