Një ekip i FBI-së greke është dërguar në Lesvos për të hetuar faktet e çuditshme në rastin e vdekjes së rojes bregdetare, 29-vjeçarit, Nikos Karaklas, i cili shërbente në Njësinë e Narkotikëve të Rojes Bregdetare dhe u gjet i varur në kapelën e Panagia Faneromeni në Sigri, Lesvos.
Ndonëse fillimisht autoritetet policore të ishullit bënë me dije se bëhej fjalë për një vetëvrasje, pas ankesave të familjes për kërcënimet që merrte efektivi i Rojës Bregdetare, nisi një hetim i thelluar për të përcaktuar nëse ishte një vepër kriminale.
Veç oficerëve të FBI-së greke, rasti po hetohet edhe nga Punët e Brendshme të Forcave të Sigurisë, pasi 29-vjeçari fatkeq shërbente në Divizionin e Narkotikëve të Rojës Bregdetare si mbajtës qensh K9. Në fakt, pak orë para se të gjendej i vdekur, një sasi e madhe droge (8 kilogramë marijuanw dhe 1 kilogram kokainë) ishte zbuluar në një kamion që kishte mbërritur në ishull me anije nga porti i Pireut. Për këtë rast është arrestuar një 30-vjeçar grek, por një shqiptar me banim të përhershëm në Lesvos i ka shpëtuar arrestimit. Policia është në kërkim si për çështjen e drogës ashtu edhe për përfshirjen e tij të mundshme në vdekjen e rojes bregdetare, e cila shërbente në Njësinë e Kontrollit të Narkotikëve. Vlen të theksohet se Niko ishte martuar së fundmi dhe po planifikonte edhe Pashkët me gruan e tij , por disa ditë më parë ai u gjet i vdekur.
Siç thonë gruaja dhe prindërit e tij, ai nuk ka lënë kurrë përshtypjen se do t’i jepte fund jetës. Përkundrazi, prindërit e tij flasin hapur për mundësinë e veprimtarisë kriminale. Nëna e tij dëshmoi se fëmija i saj kishte marrë kërcënime edhe në të kaluarën, ndërsa në deklaratat e saj në mënyrë kuptimplote përmendte se “në vend të tij luhej për shumë para”.
Të tjera informacione nga rrethi i tij i ngushtë thonë se dy ditët e fundit ai është shfaqur sikur diçka po e shqetësonte. Vlen të theksohet se ai ishte me pushim mjekësor, ndonëse sipas burimeve të tjera mund të ishte në shërbim për rastin e drogës që u hetua në port pak orë para se të gjendej i varur në kryqin e kishës prej mermeri.
Atë ditë ai qarkullonte me automjetin e tij zyrtar, por pa qenin e tij K9, të cilin e kishte lënë në shtëpi. Familja e 29-vjeçarit shpreh dyshime të rënda për shkakun e vdekjes dhe ka caktuar një konsulent teknik mjeko-ligjor për ekspertizë të pavarur, pasi mendojnë se nuk është përjashtuar mjaftueshëm mundësia e një vepre penale. Ndër të tjera, kërkohet hetim për faktin se këmbët e rojes bregdetare fatkeqe preknin tokën nga pika ku u gjet i varur, gjë që ngre pikëpyetje nëse ishte inskenuar një skenë vetëvrasjeje. Gjithashtu, prindërit e tij ngritën padi ndaj një punonjësi policie në shërbim të Drejtorisë së Policisë Lesvos, i cili dyshohet se e lidhte vdekjen e rojes bregdetare me rrjetet e trafikut të drogës, në një postim të tij në rrjetet sociale në maj të vitit 2024. Në atë kohë ai kishte shkruar se “kishin vënë një ujk me qafë të trashë për të ruajtur delet”.
Ai e ripublikoi këtë postim, duke komentuar vdekjen e 29-vjeçarit të rojes bregdetare. Policia që po heton rastin po kërkohet të hetojë nëse para se të gjendej i vdekur kishte marrë pjesë në një përleshje me një person tjetër, pasi u gjet i plagosur në fytyrë dhe pjesë të tjera të trupit, ndërsa një pyetje është se si përfundoi në Sigri nga shtëpia e tij në Moria dhe shtëpia e prindërve të tij pas një udhëtimi një orë e gjysmë dhe madje duke lëvizur me automjetin zyrtar të rojes bregdetare.
Përgjigjet priten të jepen nga celulari i tij, i cili u gjet së bashku me këpucët e tij 87 kilometra larg vendit ku dha frymën e fundit. Policia do të ekzaminojë se me kë ka folur ai përpara ngjarjes fatale, duke i bërë thirrje që të japin shpjegimet e tyre për orët e fundit të rojes bregdetare derisa u gjet i varur. m.p.
