Kreu i PD, Sali Berisha, ka dalë me një njoftim në faqen e tij në Facebook ku thërret mediat në konferencë të jashtëzakonshme. Përmes një njoftimi lideri demokrat ka njoftuar një konferencë të jashtëzakonshme në ambientet e hotel Rogner në orën 17:30.
“NJOFTIM PËR SHTYP – Në ora 17:30, Kryetari i Partisë Demokratike, Prof. Dr. Sali Berisha do të mbajë një konferencë për shtyp në Hotel Rogner, salla Antigonea. Ftohet media të marrë pjesë.
ZYRA E MEDIAS DHE KOMUNIKIMIT, PARTIA DEMOKRATIKE”
Dalja e Berishës në konferencë dyshohet se lidhet me përgënjeshtrimin nga delegacioni i Bashkimit Europian në Tiranë mbi lajmin e publikuar në portalin Syri.net ku shkruhej se ambasadori i BE në Tiranë, Silvio Gonzato, ka ndërhyrë në raportin paraprak të publikuar nga OSBE/ODIHR lidhur me zgjedhjet parlamentare të 11 majit.
Në lajmin e publikuar nga Syri.net nënvizohej se ambasadori Gonzato ka ndëryrë në momentet e fundit në raportin e OSBE/ODIHR ku ka hequr disa emra konkretë nga raporti “emra banditësh, drejtorësh, shefa policie në Elbasan që janë angazhuar në krim elektoral”, shkruhet në lajm.
Në reagim, delegacioni i BE në Tiranë është shprehur se raportet e vëzhgimit zgjedhor të OSBE/ODIHR “janë të pavarura, të paanshme dhe bazohen vetëm në gjetje të verifikuara nga ekipet e tyre të vëzhguesve”, duke përgënjeshtruar kështu artikullin e shkruar nga Syri. m.p.
