Një zbulim i jashtëzakonshëm në qytetin Folschviller të Francës mund të ndryshojë të ardhmen e energjisë në botë. Shkencëtarët francezë kanë zbuluar një depozitë natyrore prej 46 milionë tonësh hidrogjeni të bardhë – një formë e rrallë dhe e pastër energjie që gjendet në natyrë, pa nevojën e prodhimit industrial dhe pa emetime karboni.
Zbulimi u bë nga studiues të laboratorit GeoRessources dhe CNRS, teksa ata po kërkonin metan në thellësi 1,250 metra nën tokë. Ky hidrogjen natyror përfaqëson më shumë se gjysmën e prodhimit vjetor të hidrogjenit gri në botë dhe mund të ofrojë një alternativë më të lirë, më të pastër dhe më të qëndrueshme për tranzicionin energjetik global.
Nëse rezervat e ngjashme ekzistojnë edhe në vende të tjera, ky zbulim mund të revolucionarizojë mënyrën se si prodhohet dhe përdoret energjia, duke e vendosur Francën në pararojë të një epoke të re energjie të pastër dhe të qëndrueshme. Hulumtimet vazhdojnë për të eksploruar potencialin e plotë të kësaj pasurie të re natyrore./e.t
