Në Ditën Ndërkombëtare të Punëtorëve, sindikatat dhe organizatat e të drejtave në punë mbledhin qindra qytetarë në protestë me thirrjen kryesore: paga dinjitoze dhe kushte të sigurta pune.
Nën moton “Paga shqiptare, çmime evropiane!”, punonjësit denoncojnë diferencën e madhe mes kostos së jetesës dhe pagave minimale në Shqipëri.
Koordinatori i Unionit të Sindikatave, Kondi Ilia, thekson se pavarësisht largimit masiv të fuqisë punëtore drejt emigracionit, pagat në Shqipëri nuk pasqyrojnë realitetin e tregut dhe nevojat bazë të qytetarëve.
Nga Qendra për të Drejtat në Punë, Gertjana Hasalla shpreh se situata e punëtorëve është bërë e paqëndrueshme, pasi “punojnë shumë, paguhen pak dhe përballen me kosto jetese gjithnjë e më të larta.”
Ajo thekson se solidariteti dhe organizimi kolektiv janë mjete kyçe për përmirësimin e kësaj gjendjeje.
Ndërkohë, Sidorela Vatnikaj nga Qendra “Drejtësi Sociale” ndalet te sektori i pastrimit, një ndër më të nënvlerësuarit, paga mesatare 35-37 mijë lekë, ndërsa vetëm qiraja merr mbi gjysmën e saj. Ajo denoncon mungesën e kontratave të rregullta, diskriminimin, dhe mungesën e pajisjeve të sigurisë, që i kthejnë këto vende pune në hapësira të pasigurta dhe shfrytëzuese.
Në fokus të protestës janë edhe problemet si punësimi informal, mungesa e mbrojtjes ligjore dhe mosrespektimi i të drejtave themelore, sidomos në sektorë si fasoneria, ndërtimi, shërbimet dhe call center-at.
Hasalla thekson se gratë dhe të rinjtë janë më të prekshëm, përballë orareve të gjata, presionit dhe mungesës së sigurisë ekonomike.
Protestuesit kërkojnë ndërhyrje të menjëhershme për të siguruar paga të denja, kushte pune të standardizuara, sigurime shëndetësore dhe mbështetje institucionale për organizimin sindikal./E.T
