Më shumë se dy milionë njerëz morën pjesë në një koncert falas të Lady Gaga-s në plazhin Copacabana në Rio de Janeiro, sipas zyrtarëve të qytetit.
Koncerti më i madh ndonjëherë i yllit të pop-it u financua nga bashkia e qytetit si pjesë e një përpjekjeje për të rigjallëruar ekonominë e Rios.
Autoritetet presin që eventi të sjellë rreth 100 milionë dollarë (75 milionë paund) në ekonominë lokale.
Performanca e së shtunës ishte pjesë e një turi promovues për albumin e saj të tetë, “Mayhem”, që përfshin këngë si “Abracadabra” dhe “Die With a Smile”. Lady Gaga kishte performuar për herë të fundit në Brazil në vitin 2012.
Disa nga fansat – të njohur si “Mostrat e Vegjël” të Gaga-s – filluan të prisnin në radhë që në mëngjes herët për të siguruar një vend në plazh.
Për ngjarjen u organizua një operacion masiv sigurie me 5,000 efektivë policie në detyrë dhe kontrolle me detektorë metalesh për të gjithë pjesëmarrësit. Autoritetet përdorën gjithashtu dronë dhe kamera me njohje të fytyrës për të mbikëqyrur turmën.
Lady Gaga nuk është artistja e parë që mban një koncert falas në Rio. Edhe Madonna kishte dhënë një koncert në Copacabana në maj 2024, i cili po ashtu ishte financuar nga bashkia.
“Ju më pritët, më pritët për më shumë se 10 vjet,” tha Lady Gaga me emocion para turmës, ndërsa shpaloste flamurin brazilian.
“Brazil, jam gati. Do të jap gjithçka nga vetja.”
Ylli i pop-it u shfaq në disa akte me kostume të frymëzuara nga Brazili, përfshirë veshje me tematikë nga kombëtarja e futbollit.
Mijëra vetë kënduan bashkë me të hitet e saj më të njohura, si Alejandro, Poker Face dhe Abracadabra, duke krijuar një atmosferë elektrizuese, teksa shumë prej tyre valëvitnin ventilatorë me ngjyra ylberi dhe ndiqnin koncertin nga ekranet gjigante në plazh.
Fansat kishin ardhur nga e gjithë Brazili për të parë performancën madhështore.
Një burrë 28-vjeçar, Luan Messias, tha se kishte udhëtuar gjithë natën me autobus nga Itanhaem, në shtetin fqinj të Sao Paulo./E.S
