Ministri i Drejtësisë, Ulsi Manja në takimin elektoral përmbyllës të fushatës në Lezhë i ka kthyer përgjigje edhe ish-kryeministri Sali Berisha për makinën luksoze të Noizyt, e cila vlen të theksohet që është komentuar përgjatë ditëve të fundit gjerë e gjatë.
Krah Noizy, Manja ia ktheu Berishës duke i thënë se makina që reperi përdori në inaugurimin e rrugës së Arbrit është blerë me punën që ai ka bërë ndër vite, teksa më tej përmendi dhe marrëveshjen e lobimit miliona dollarë.
“E mendoni sa pensionistë mund të paguhen me 6 milionë dollarët e Saliut. Po ai pse do ta heq damkën, ai si me damkë si pa damkë në 12 maj ai është tek shtëpia. E kishte merak Saliu që këndohej kënga e Hajredin Pashës dhe se Noizy kishte ardhur me Lamborghini. Por sot dua të them se më në fund u përmbush një ëndërr shekullore e Dibrës për t’u lidhur me Tiranën. Dhe ku ka më mirë se ky përurim të bëhet me një Lamborghini, të blerë me talentin e këtij djali”, tha ai.
Kujtojmë se më herët kreu i demokratëve, Sali Berisha tha se Lamborghini i Noizyt kushton sa 50 mijë pensione.
“Rama në vend të debatit dhe transparencës paraqet së fundmi Lamborghinin e Noizyt. Ai ta gëzojë se e ka nga fitimet e këngëve, por ai kushton sa 50 mijë pensione. Siç kushton djegësi i Tiranës i zhdukur 130 milionë.
Ka zhdukur 130 milionë euro taksat tuaja. Ku janë? Ku është djegësi i Fierit që e shëtitën vërdallë dhe sot është një llamarinë që s’punon? Ku janë 120 milionë euro të Becchetit? 21 milionë euro udhëtime me avion taksi? Ku janë 33 mijë euro shishja e Romano Kontit? Prandaj urdhri mos dilni para qytetarëve. Ai që fshihet është më i ligu. 11 maji po vjen. Edi Rama është fundi yt”, tha Berisha një ditë më parë. m.p.
