Në vend që të festonte në paqe 50-vjetorin me familjen e tij, David Beckham është përballur me një krisje serioze me djalin e madh, Brooklyn, dhe nusen e tij, Nicola Peltz.
Brooklyn Beckham, 26 vjeç, dhe bashkëshortja e tij Nicola, 30, kanë munguar në të gjitha festat madhështore të organizuara për Davidin – në Francë, Londër dhe në rezidencën e familjes në Cotsëolds. Megjithëse çifti ndodhej në Londër gjatë gjithë kohës, ata nuk u panë në asnjë prej ngjarjeve familjare, duke ngritur spekulime mbi një krisje të thellë brenda familjes Beckham.
Sipas burimeve të afërta me familjen, shkak i përplasjes nuk është thjesht një mosmarrëveshje e zakonshme. Shumë pretendime kanë shigjetuar aktoren Nicola Peltz, të cilës i atribuohen përpjekjet për të izoluar Brooklyn nga familja e tij. Ajo akuzohet se nxit debate para çdo aktiviteti familjar dhe më pas bind të shoqin të mos marrë pjesë.
Spekulimet morën një tjetër kthesë kur u përfol se shkaku i mungesës së Brooklyn ishte lidhja e vëllait të tij Romeo me Kim Turnbull – një vajzë që në të kaluarën ishte pjesë e një rrethi shoqëror ku ndodhej edhe Brooklyn. U hamendësua se Kim kishte qenë ish-e dashura e tij, por kjo u përgënjeshtrua nga vetë vëllai i vogël, Cruz, në një koment në Instagram ku tha: “Brooklyn dhe Kim nuk kanë qenë kurrë çift.”
Burime pranë familjes shprehen se kjo është një narrativë e shtrembëruar dhe se është Nicola ajo që nuk dëshiron që Brooklyn të ketë kontakte me familjen. Madje, thuhet se çifti kërkoi një takim privat me Davidin për ta festuar ndarazi ditëlindjen e tij, larg pjesëtarëve të tjerë të familjes, por kjo kërkesë nuk u pranua.
Pavarësisht thirrjeve të përsëritura dhe ftesave për të marrë pjesë në festimet, Brooklyn refuzoi edhe një udhëtim peshkimi me babain dhe vëllezërit e tij. Ndërkohë, në festën madhështore në restorantin “Core” në Londër, David mori pjesë i shoqëruar nga miq të famshëm si Tom Cruise dhe ish-bashkëlojtarë të tij, ndërsa fjalimin e mbajti Romeo, duke zëvendësuar vëllanë më të madh.
Ndërsa media dhe opinioni publik vijojnë të analizojnë çdo detaj të kësaj përçarjeje, burime pranë familjes thonë se David dhe Victoria vazhdojnë të jenë të hapur për rikthimin e djalit të tyre në rrethin familjar, pavarësisht tensioneve të momentit. /e.t
