Kreu i Partisë Mundësia, Agron Shehaj, ka reaguar pas suksesit të forcës së tij politike në zgjedhjet e 11 majit, ku Partia Mundësia arriti të sigurojë dy mandate në qarkun e Tiranës.
Shehaj ka bërë reagimin e tij nga ambientet e numërimit të votës së diasporës, duke e cilësuar rezultatin si një moment të ri për opozitën.
Nga ana tjetër Shehaj tha ‘Mundësia’ është opozita e shekullit të 21 duke nënkuptuar një diferencë me opozitën aktuale që trajtohet si monopol i Partisë Demokratike e cila pati një humbi të thellë në këto zgjedhje. Mesa duket në postimin e tij Shehaj kërkon të marrë drejtimin e opozitës dhe largimin e Berishës, duke thënë në urimin e tij se ‘Mundësia’ është një parti që sheh nga e ardhmja dhe i përfshin të gjithë.
“E pamundura, ndodhi. Pavarësisht frikës së mbjellë natë për natë, pavarësisht një sistemi të ngritur për të mos lënë askënd të ri të ngjitet, pavarësisht propagandës, pushtetit dhe establishmentit. Luftuam, u përballëm dhe ia dolëm. Dy mandate. 50 mijë qytetarë që na besuan. Pa premtime boshe. Pa lojëra. Pa pazare. Pa ‘më jep të të jap’. Kemi thyer një mur që dukej i pakalueshëm. Por puna e vërtetë fillon tani. Ne do të jemi aty, me zë, me fakte, me qëndresë. Për çdo qytetar që na dha votën. Për çdo shqiptar që pret më shumë. Për të gjithë ata që na kanë ndjekur nga larg, që kanë shpresuar, por nuk kanë besuar plotësisht se ndryshimi ishte i mundur… Nuk ka më kohë për të qëndruar spektatorë apo për të pritur një shpëtimtar. Ejani! Bashkohuni me ne! Me mbështetjen tuaj, çdo gjë është e mundur. Partia Mundësia është opozita e shekullit 21. E ndershme. E vërtetë. Moderne. E vendosur. Një opozitë që sheh nga e ardhmja, një e ardhme që na përfshin të gjithëve. Faleminderit nga zemra çdo votuesi, vëzhguesi, koordinatori, kandidati, kandidati nga diaspora, ambasadorëve të Partisë Mundësia, pjesëmarrësve në takime dhe të gjithë atyre që na kanë mbështetur, haptazi apo në heshtje. Faleminderit të gjithëve!” – shkruan Shehaj.
Shehaj sipas njoftimit të përditësuar të KQZ ka marrë në total në rang kombëtar 43069 vota. Kreu i Partisë Mundësia ka siguruar dy mandate në parlamentin e ardhshëm vetëm në qarkun e Tiranës, ku ka marrë 21705 vota. Nga Partia Mundësia do të hyjnë në parlamentin e ardhshëm, Agron Shehaj dhe Erald Kapri i dyti në listën e qarkut të Tiranës./e.t
