Lideri suprem iranian është shprehur skeptik se bisedimet me Shtetet e Bashkuara për çështjen bërthamore do të çojnë në një marrëveshje, për shkak të kërkesave “të ekzagjeruara dhe agresive” të palës amerikane lidhur me pasurimin e uraniumit.
“Ne nuk besojmë se ato do të çojnë në një marrëveshje. Nuk e dimë se çfarë do të ndodhë”, ka deklaruar Ajatollah Ali Khamenei.
Javën e kaluar, presidenti Donald Trump tha se Irani “në njëfarë mënyre” kishte pranuar kushtet për një marrëveshje, pas 4 raundeve të bisedimeve të ndërmjetësuara nga Omani që prej 12 prillit.
Por përpara një raundi të ri të planifikuar për këtë fundjavë, kryenegociatori iranian kundërshtoi pretendimet e homologut amerikan se duhet të premtojë ndalimin e pasurimit të uraniumit, që mund të përdoret si karburant për reaktorët, por edhe si armë bërthamore.
Trump, që i tërhoqi Shtetet e Bashkuara nga marrëveshja e vitit 2015 mes Republikës Islamike dhe fuqive botërore, ka paralajmëruar se Irani mund të përballet me aksione ushtarake amerikano-izraelite nëse bisedimet mbyllen pa një rezultat të mirëfilltë.
Nga ana e tij, Irani insiston se aktiviteti i tij bërthamor është paqësor, vendi i ka tejkaluar kufizimet e vendosura nga ndërkombëtarët dhe ka akumuluar mjaftueshëm uranium për të prodhuar një arsenal bombash. m.p.
