Elbasani është qarku i vetëm që vijon numërimin e votave të diasporës për kandidatët në listat e hapura. Komisioni Qendror i Zgjedhjeve njoftoi ditën e sotme se në 11 qarqet e tjera ky proces ka përfunduar.
Edhe përfundimi i numërimit në Elbasan është një formalitet tashmë pasi nuk pritet që të ndryshojë gjë sa i përket kandidatëve që kanë fituar.
Kujtojmë se gjatë gjithë kësaj kohe, gara ka qenë brenda PS-së, me kandidatët socialistë që luftonin për mandat në disa qarqe.
Për shembull në Tiranë, Olta Xhaçka fitoi me një diferencë prej vetëm 100 votash me kolegen Blerina Gjylameti. Në Fier, Zegjine Çaushi ia doli të fitonte karrigen në Kuvendin e Shqipërisë me 64 vota para koleges Maldrita Bardho.
Partia Socialiste fitoi 83 mandate në zgjedhjet e 11 Majit, ndërsa Partia Demokratike 50. Pjesa tjetër u nda mes PSD-së që mori 3 mandate, Partia Mundësia me 2 mandate dhe Nisma Shqipëria Bëhet e Lëvizja Bashkë nga 1 mandat./e.s
