Punimet për rehabilitimin dhe zgjerimin e autostradës Tiranë-Durrës po vijojnë me ritme të shpejta.
Aktualisht, në fazën e dytë të tyre, janë realizuar rreth 50% e punimeve fizike sipas Autoritetit Rrugor Shqiptar
Më konkretisht në disa pjesë të aksit rrugor janë bërë edhe shtresat e reja asfaltike dhe për shkak të avancimit të fazës së punimeve është bërë edhe devijim i qarkullimit të automjeteve që vijnë nga Durrësi në drejtim të kryeqytetit.
“Është punuar me ndërtimin e dy korsive të reja në të dy anët e rrugës, ku konkretisht në anën e majtë drejtimi Tiranë-Durrës është punuar dhe me realizimin e shtresave asfaltike. Për këtë qëllim, trafiku i mjeteve nga Durrësi drejt Tiranës është devijuar në dy korsitë e reja të ndërtuara me qëllim vijimin e punimeve në korsitë ekzistuese“, thotë Adja Sefa, nga Sektori i Menaxhimit të Projekteve në ARRSH.
Punimet në këtë arterie të rëndësishme për 6 kilometra, e para nga Qafë-Kashari drejt ish-sheshit Shqiponja dhe anasjelltas, përfundojnë në fund të vitit.
“Duke qenë që punimet kanë ecur me ritme të kënaqshme, edhe pse afati kontraktual është Shtatori 2026, pritet që punimet të përfundojnë brenda këtij viti, në Dhjetor 2025”.
Shumë shpejt, sipas ARRSH, pritet të nisë puna edhe për rikualifikimin e zgjerimin e mbikalimit në Qafë-Kashar, në mënyrë që të përballojë fluksin e automjeteve që do të jetë në 8 korsitë e autostradës.
Pas përfundimit të këtij projekti rrugor, në aksin Tiranë – Durrës shpejtësia e lejuar në autostradën e Tipit A do të jetë 130 km/h./E.T
