Një prokurore pranë Gjykatës së Shkallës së Parë në Sarandë është kërcënuar ditën e sotme në zyrën e saj. Ngjarja ka ndodhur këtë pasdite ndërsa identiteti i prokurores nuk është bërë me dije për mediat.
Sipas asaj që raportohet, dy shtetase janë paraqitur në Prokurorinë e Përgjithshme të Sarandës, të cilët kanë kërkuar takim me prokuroren. Të dyshuarat janë të afërmet e një të miture, ndaj të cilës prokurorja në fjalë i ka caktuar masën e sigurisë “arrest shtëpie” për një vepër penale.
Të dyshuarat kanë kanosur dhe fyer prokuroren në zyrën e saj pasi nuk ka qenë dakord për këtë masë sigurie. Lidhur me këtë ngjarje është njoftuar Policia e Sarandës, ndërsa është bërë dhe shoqërimi për në komisariat i të dyshuarave, nga të cilët janë marrë dhe dëshmitë.
Dy shtetases po hetohen për veprën penale “Kanosja e gjyqtarit”, ndërsa si provë kryesore do të shërbejnë pamjet filmike të kamerave të sigurisë të institucionit të sekuestruara nga autoritetet. m.p.
