Armëpushimi midis Izraelit dhe Iranit i shpallur nga Donald Trump dje mbetet “i brishtë”, pasi ai fillimisht u shkel, derisa presidenti amerikan më në fund kërkoi publikisht angazhimin e palëve në zbatimin e tij.
Megjithatë, Ajatollah Ali Khamenei, njeriu që tërheq fijet pas asaj që po ndodh në Teheran, ende nuk e ka konfirmuar armëpushimin. Udhëheqësi suprem 86-vjeçar i Iranit, i cili sipas informacionit të cituar nga BBC, është fshehur në një bunker, ka kaluar pothuajse katër dekada duke luajtur me kujdes një lojë afatgjatë kundër armikut të tij më të fuqishëm, SHBA-së, me qëllim mbrojtjen e aseteve të tij më të rëndësishme: Republikës Islamike.
“Lëvizjet e ardhshme të Khameneit do të jenë më të rëndësishmet jo vetëm për mbijetesën e tij, por edhe për mënyrën se si do të mbahet mend”, thotë Sanam Vakil, drejtoreshë e programit të Lindjes së Mesme dhe Afrikës së Veriut në grupin e mendimit Chatham House.
“Kupa e tij sot është nhdoshta më e hidhur se ajo që piu Khamenei në vitin 1988, kur u detyrua të pranonte me hidhërim një armëpushim në luftën shkatërruese Iran-Irak”, thotë Vakil.
Duke pasur frikë nga atentati, udhëheqësi suprem i Iranit komunikon kryesisht me komandantët e tij përmes një ndihmësi të besuar, duke pezulluar komunikimet elektronike për ta bërë më të vështirë gjurmimin e tij, sipas tre zyrtarëve iranianë që folën për Neë York Times.
I fshehur në një bunker, udhëheqësi suprem, Ajatollah Ali Khamenei, ka zgjedhur një sërë zëvendësimesh nga stafi i tij ushtarak në rast se vriten më shumë nga togerët e tij të lartë, thanë ata.
Dhe në një veprim të jashtëzakonshëm, shtuan zyrtarët, Khamenei madje ka emëruar tre klerikë të lartë si pasardhës të mundshëm në rast se ai vritet, ndoshta shenja më treguese e situatës së pasigurt në të cilën ai dhe sundimi i tij 30-vjeçar ndodhen.
Sulmet e SHBA-së dhe Izraelit janë sulmi më i madh ushtarak ndaj Iranit që nga lufta e Irakut në vitet 1980 dhe ndikimi në Teheran ka qenë veçanërisht i rëndë.
Në vetëm pak ditë, sulmet izraelite ishin më intensive dhe shkaktuan më shumë dëme në Teheran sesa Sadam Husseini në të gjithë luftën e tij tetëvjeçare kundër Iranit. m.p.
