Vala e të nxehtit afrikan ka përfshirë vendin tonë me temperatura ekstremisht të larta. Sipas sinoptikantëve, vala do të do të zgjasë deri në fundjavë, ndërsa kulmi i të nxehtit do të arrijë të premten ku temperaturat pritet të ngjiten deri në 40-45 gradë Celcius.
Meteorologu Hakil Osmani ka zbuluar se në rang territori maksimumet do të kapin vlerat 39-40 gradë, ndërsa qarku i Elbasanit do të regjistrojë temperaturat më të larta. Theksohet se në diell, temperaturat e ajrit ndihen 4-5 gradë më të larta se sa vlerat normale.
“Territori shqiptar është nën ndikimin e valëve të të nxehtit afrikan, duke bërë që të kemi temperatura ekstremisht të larta. Maksimumet në rang territori do të regjistrohen në vlerën 39-40 gradë Celsius. 40 gradë Celsius do të regjistrohet në qarkun e Elbasanit, ndërsa Berati e Kopliku pritet të regjistrojnë temperatura të ajrit në vlerën 39 gradë Celsius. Në diell, temperaturat e ajrit zakonisht ndihen edhe në 4-5 gradë më të larta se sa vlerat normale. Valët e të nxehtit momentalisht do të zgjasin deri në fundjavë, ndërsa dita e shtunë dhe e dielë do të sjellin një rënie graduale të temperaturave të ajrit”, thotë meteorologu Hakil Osmani nga Meteoalb.
Autoritetet apelojnë për kujdes të shtuar ndaj fëmijëve, të moshuarve dhe të sëmurëve kronikë, si dhe shmangie të ekspozimit në diell gjatë orëve të mesditës. m.p.
