Një zjarr i madh në një nga destinacionet turistike më të njohura të Greqisë, në ishullin jugor grek, Kretë, po vazhdon të digjet nga zjarri që shpërtheu të mërkurën pasdite. Zjarri filloi në një terren të thyer pyjor pranë komunës së Lerapetrës, por flakët tani janë përhapur me shpejtësi drejt jugut, duke kërcënuar shtëpitë, akomodimet turistike dhe infrastrukturën kritike.
Rreth 3,000 banorë janë evakuuar dhe vendosur në strehimore të përkohshme pasi të paktën katër vendbanimeve iu dha urdhër të largoheshin. Fronti i zjarrit tani shtrihet në të paktën 6 km, sipas shërbimeve të emergjencës, duke e bërë gjithnjë e më të vështirë kontrollin.
Autoritetet kanë lëshuar urdhra evakuimi për disa vendbanime, duke përfshirë Achlia, Agia Fotia, Galini, Ferma dhe Koutsounari. Në këto zona të prekura, ekipet e ndihmës së shpejtë kanë punuar pa u lodhur për të zhvendosur banorët dhe vizitorët në vende të sigurta.
“Është një situatë shumë e vështirë. Zjarri është shumë i vështirë për t’u mbajtur nën kontroll. Tani për tani, ata nuk mund ta përmbajnë atë”, tha për Associated Press Nektarios Papadakis, një zyrtar i mbrojtjes civile në autoritetin rajonal.
Turistët u panë duke ikur nga vilat dhe shtëpitë e pushimit në Kretën lindore. Videot nga ishulli grek tregojnë kaosin ndërsa pushuesit përpiqen të hipin në automjete për t’iu larguar zjarrit të tërbuar.
Të paktën katër të moshuar janë dërguar në spital me probleme të frymëmarrjes të shkaktuara nga thithja e tymit. Si masë paraprake, të gjitha spitalet në Kretë janë vënë në gatishmëri nga autoritetet shëndetësore. m.p.
