Bashkia e Urës Vajgurore së shpejti do të marrë emrin Dimal. Propozimi erdhi nga disa intelektualë të zonës të cilët u bazuan te rrënojat e qytetit antik të periudhës Ilire. Shumë prej banorëve kanë rënë dakord me vendimin, ndërsa kryetarja e bashkisë tha se ky propozim ka për qëllim zhvillimin e turizmit në këtë zonë.
“Zbulimi i qytetit Antik të Dimalit zgjoi idenë e për ta shndërruar emrin e Bashkisë së Urës Vajgurore në atë të Dimalit me qëllim shndërrimin gradualisht në një destinacion turistik të kësaj qyteze.
Kemi jo më pak se 2 – 3 vjet që kemi nisur punën për ndryshimin e emrit të bashkisë sonë, pra riorganizim pa ndryshim kufijsh. Duke evidentuar dhe duke nxjerrë në pah të gjithë asetet që ka ky territor, do të zhvillim dhe rrjetëzimin e të gjithë zonës së Dimalit”, është shprehur kryetarja e bashkisë.
Brenda 2 javëve të ardhshme relacioni me propozimin për ndryshimin e emrit do të kalojë në Këshillin Bashkiak e më pas do të miratohet në Parlament./Re.Gu/Fjala.al
