Prokuroria e Tiranës u ka kërkuar kompanive celulare të dërgojnë tabulatet telefonike për thirrjet dhe komunikimet në rrjete të ndryshme. Prokurorët “rrëzojnë” dëshminë e parë të së mbijetuarës Blerta Josifi.
Pritet pyetja për herë të dytë në prani të psikologut. Hetimet për të zbuluar çfarë ndodhi në shtëpinë e tmerrit ku nënë e bijë, Zhaneta dhe Anisa Josifi, u vetëflijuan duke shpresuar në ringjallje…
Nga Elvis Myrta
Për zbardhjen e ngjarjes makabre të 12 ditëve më parë, në Kombinat, ku u gjetën të vdekura nënë e bijë, Zhaneta dhe Anisa Josifi, prokuroria është fokusuar te komunikimet telefonike që ato kanë pasur gjatë dy viteve të fundit dhe te zbërthimi i kodeve në ditaret që u gjetën në banesën e tyre.
Prokuroria ka sekuestruar tre telefonat e familjes Josifi dhe i ka dërguar për ekspetizë. Shpresat e institucionit të akuzës për zbardhjen e kësaj ngjarjeje të rëndë janë pikërisht tek telefonat e dy viktimave dhe të të mbijetuarës.
Hetuesit u kanë dërguar kompanive celulare numrat që gratë e familjes Josifi kanë pasur në përdorim, për të parë se me kë kanë komunikuar ato kohët e fundit. Burime nga prokuroria i thanë gazetës “Fjala” se zbardhja e tabulateve telofonike mund të hedhë dritë nëse Zhaneta dhe Anisa kanë qenë apo jo pjesë e ndonjë sekti fetar, që mund t’i ketë indoktrinuar ato dhe shtyrë drejt aktit ekstrem.
Gjithashtu, prokurori i çështjes Arben Demilari, është duke punuar për të zbërthyer enigmat që u gjetën në ditarin që dyshohet se është mbajtur nga të dyja motrat. Zbërthimi i citateve që janë shkëputur nga libri Dhiata e Re do të çonte prokurorinë drejt sektit që mund t’i ketë shtyrë drejt vetëflijimit 56-vjeçaren dhe dy vajzat e saj.
Gjithashtu, hetuesit janë në pritje edhe të ekspertizës mjeko-ligjore, e cila do të përcaktojë shkakun e vdekjes së Zhanetës dhe Anisës, si dhe kohën kur ka ndodhur. Burime nga institucioni i akuzës i thanë gazetës “Fjala” se ekspertiza nuk ka mbërritur ende. Sipas tyre, ekspertiza mjeko-ligjore pritet të mbërrijë në fund të kësaj jave, ku edhe do t’i bashkëngjitet dosjes hetimore.
Ndërkohë, mësohet se prokurori i çështjes i ka lënë disa detyra policisë për të verifikuar, nëse kanë hyrë njerëz të tjerë apo jo në banesën ku dyshohet se u mbajt për gati një vit e gjysmë trupi i pajetë i Anisës, i cili ishte mumifikuar në mënyrë perfekte. Deri tani hetuesit i kanë përqendruar hetimet bazuar në dëshminë e të mbijetuarës së vetme të kësaj ngjarjeje të rëndë.
Burimet thanë se në ditët në vijim Blerta Josifi do të merret sërish në pyetje, pasi, sipas hetuesve, 34-vjeçarja dëshminë e saj të parë e ka dhënë në gjendje të rënduar psikologjike. Nga informacionet që “Fjala” ka siguruar mësohet se kur t’i merret dëshmia e dytë Blerta Josifit, i pranishëm do të jetë edhe prokuri i çështjes.
Prokuroria nuk do ta marrë për bazë dëshminë e parë që e mbijetuara e vetme e kësaj ngjarjeje të rëndë ka dhënë përpara oficerëve të Policisë Gjyqësore, pasi ajo ka qenë në gjendje të rënduar psikologjike. Për zbardhjen e këtij makabriteti do të përqendrohen te personat e tjerë që mund t’i kenë shtyrë drejt vetëflijimit pjesëtaret e familjes Josifi.
Deri tani provat e vetme të administurara nga prokuroria janë ditaret dhe citimet e gjetura në banesën e pjesëtareve të familjes Josifi. Nga verifikimet e para ka rezultuar se Anisa Josifi ka humbur jetën për shkak të mosushqyerjes, ndërsa referuar deklarimeve 34-vjeçares Blerta Josifi, motra e saj ka qëndruar 52 ditë pa ngrënë, deri sa humbi jetën, në mars të vitit të kaluar.
Ajo ka treguar se bashkë me nënën e saj besonin se Anisa do të ringjallej, dhe filluan të sakrifikonin, duke refuzuar edhe ato ushqyerjen. Për shkak të gjendjes së rënduar, ajo aktualisht qëndron e shtruar në Spitalin Psikiatrik, dhe mjekët nuk kanë lejuar që hetuesit ta marrin në pyetje, derisa ajo të përmirësohet.
Pasi të mësohet koha se kur kanë humbur jetën nënë e bijë, dhe pasi institucionit të akuzës t’i mbërrijë përgjigjja nga kompanitë celulare, mbi personat me të cilët ato kanë komunikuar gjatë dy viteve të fundit, prokurori i çështjes do të nisë me marrjen në pyetje të të gjithë personave që kanë vizituar dy vitet e fundit banesën e familjes Josifi.
