Kryeministri Edi Rama është shprehur i kënaqur për mediat pas marrëveshjes së firmosur me opozitën parlamentare për votimin e marrëveshjes së 5 qershorit për reformën zgjedhore në seancën plenare të 23 korrikut dhe ndryshimet kushtetuese më 30 korrik.
Kreu i qeverisë deklaroi se një orë e më parë puna duhet të zhvendoset në këshillin politik.
Pavarësisht se kreu i grupit parlamentar demokrat Myslim Murrizi u shpreh kundra marrëveshjes së 5 qershorit, Rama u shpreh i bindur në votimin e saj në seancën plenare të 23 korrikut.
“I kënaqur sepse kemi arritur një konsesus të gjërë edhe pse jo total për të votuar më 23 korrik marrëveshjen e 5 qershorit dhe nga ana tjetër kemi arritur dhe një konsesus të plotë, jo vetëm për të votuar më 30 korrik për t’i hapur listat dhe do t’iu japin një mundësi shqiptarëve që përveç partisë të kenë një votë parapëlqyese për deputetin që duan por edhe për të vazhduar procesin gjithëpërfshirës së bashku me opozitën jashtëparlamentare që do të thotë që një orë e më parë do të ishte mirë të mblidhet Këshilli Politik dhe në Këshilli Politik ne të diskutojmë sepse kemi hapur një diskutim para pak kohe dhe tani jemi në kushtet kur duhet të diskutojmë konkretisht pasi nga njëra anë opozita jashtëparlamentare kërkonte të dinte datën e saktë kur do të votohet marrëveshja e 5 qershorit dhe është 23 korriku dhe nga ana tjetër kemi nevojë të bashkëpunojmë dhe të ndërveprojmë edhe për mënyrën sesi do të reflektohet në ligjin zgjedhor ajo çka do të imponojë votimi i 30 korrikut, pra ndryshimi kushtetues për hapjen e listave.
Kemi bërë goxha debat për këtë me Murrizin që qëndron stoik në pozicionin e tij, ndërkohë kemi sinjale inkurajuese nga dy grupet e tjera edhe pse besoj se do ishte mirë që edhe Murrizi të bashkohej por kam bindjen qe do ta kalojmë ligjin pavarësisht faktit që në anën e opozitës parlamentare nuk ka një formacion të unifikuar por një bashkësi individësh që kanë grupet e tyre, por ka edhe të pavarur. Ka 48 orë kohë për të gjetur një mbështetje sa më të gjerë.” -u shpreh Rama.
/En.Br./Fjala.al
