Humaira Yusuf është një ndër studentet e mjekësisë në Kashmir që shpresojnë të ulen në Testin Kombëtar të Kualifikimit I cili zgjedh studentët për kurse mjekësore universitare në Indi. Planet e saj, megjithatë, janë përballur me një pengesë serioze.
“Mbyllja e internetit është një pengesë e madhe për ne studentët. Nëse do të kisha nevojë për informacion në ndonjë kapitull, do të më duhej të shikoja leksione video-je në YouTube, atëherë do më duhej të telefonoja vëllain tim në Mumbai sa herë që dëshiroja të kisha një informacion të caktuar në internet,” -ka thënë studentja Humaira Yusuf.
Më 4 gusht 2019, shteti i Jammu-së dhe Kashmir-it u ndërprenë nga pjesa tjetër e botës. Për të parandaluar trazirat, qeveria pezulloi të gjitha komunikimet, duke përfshirë linjat fikse, telefonat mobil dhe televizionin kabllor. Edhe pse ato u rikthyen më pas, interneti mbeti i bllokuar.
Më shumë se shtatë milion njerëz në Kashmir janë jashtë linje. Ky shtet mund të hyjë në librin e Rekordeve Botërore të Guinness për periudhen më të gjatë të bllokimit të internetit.
Ka pasur gjithsej 178 mbyllje të imponuara nga qeveria në Kashmir; gjatë kryengritjes së vitit 2016, kur shpërthyen në Kashmir protestat e dhunshme anti-Indi, interneti u mbyll për 133 ditë. Mbyllja e tanishme prej 156 ditësh ka vendosur një rekord të ri global.
Kjo ka sjelle probleme në ekonominë e Kashmirit. Turizmi dhe tregtia elektronike kanë qenë goditjet më të këqija. Sipas Dhomës së Tregtisë dhe Industrisë në Kashmir, rajoni ka humbur rreth 2.4 bilion dollarë.
“Unë i dërgoja klientëve të mi në New Delhi foto në “whatsapp” të produkteve”, ka thënë Adil Ahmad, një biznesmen që merret me artizanat. “Por tani për shkak të bllokadës së internetit, ne nuk jemi në gjendje të komunikojmë. Ne kemi pësuar një humbje të madhe këtë vit.
Qeveria indiane e ka cilësuar mbylljen e internetit si një masë mbrojtëse për të ndaluar komunikimin midis grupeve militante. “Ata nuk duan që bota e jashtme të dijë se çfarë ndodh në Kashmir,” ka thënë Suhail Rather, një studiues indian.
“Ata na kanë torturuar, duke vrarë dhe rrëmbyer djem të rinj që nga vitet 1990. Ata duan të tregojnë narrativën e tyre në kanalet indiane. Në momentin që interneti të rindizet, media dixhitale do të përmbytet me video të shtypjes që ushtria indiane u ka shkaktuar banorëve lokalë. ”
Shumë përfaqësues të Shteteve të Bashkuara, Kombet e Bashkuara dhe e gjithë bashkësia ndërkombëtare i kanë kërkuar Indisë që të përfundojë bllokadën e komunikimit në Kashmir. “Mbyllja e rrjetit të internetit dhe telekomunikacionit, është në kundërshtim me normat themelore të domosdoshmërisë dhe proporcionalitetit.” Deri më tani, autoritetet indiane kanë qënë të shurdhra ndaj këtyre paralajmërimeve – dhe duket se nuk ka gjasa që të fillojnë të dëgjojnë./Fjala.al/Përshtati:Kamela Liko/Burimi. The Indipendent
