Mesfushori i kombëtares së Shqipërisë, Taulant Xhaka, ka bërë të ditur se është i gatshëm ta nënshkruajë që tani kontratën deri në fund të karrierës me skuadrën e Baselit. Në një intervistë për gazetën e njohur zvicerane “Blick”, ai ka thënë se dëshiron ta mbyllë karrierën te gjigandja helvete. “Unë gjithmonë kam thënë se nëse presidenti do të ma jepte një kontratë deri në fund të karrierës sime, unë do ta nënshkruaja menjëherë”, – ka pohuar ai për të përditshmen zvicerane në fjalë.
“Qëllimi im është që ta përfundoj karrierën time te Bazeli, – ka vijuar futbollisti kuqezi.
– Nuk dua të luaj për asnjë klub tjetër.” Mesfushori 29-vjeçar, që me Baselin ka kontratë deri në verën e vitit 2021, pati shpresuar që me skuadrën zvicerane ta fitonte edhe Ligën e Evropës këtë sezon. Por skuadra helvete është mundur thellë, 1-4, përballë ukrainave të Shahjorit të Donjeckut,në atë që ishte herë e tretë për të që arrin deri në çerekfinale të veprimtarisë së dytë të klubeve të kontinentit.
Në fakt, ishte një zhgënjim i madh për skuadrën e Bazelit, që, me paraqitjet e saj kishte vërtetuar se mund të vazhdonte të konkurronte në nivel të lartë të garave ndërkombëtare. Skuadra e Xhakës pati pësuar vetëm 4 gola dhe pati shënuar 20 në 10 ndeshje në Ligën e Evropës, por ka vijuar të pësojë 4 vetëm në takimin e së martës. Vetë Xhaka nuk arriti ta mbyllë ndeshjen, për shkak të një dëmtimi.
/Fjala.al
