Tensionet midis Shteteve të Bashkuara dhe Iranit vazhdojnë të mbajnë në alarm politikën botërore.
Pas vrasjes së gjeneral Kasem Sulejmani nga SHBA, dhe kundërpërgjigjes me raketa nga Irani situata vijon të jetë e acaruar edhe pse presidenti Trump i ka bërë disa oferta Iranit.
Një ndër to është edhe ajo për një marrëveshje të re bërthamore. Por, Irani e ka hedhur poshtë një ofertë të tillë.
“Ky është një propozim krejt i pavend, veçanërisht pasi Trump vazhdon të shkelë premtimet e tij”, tha Presidenti iranian, Hassan Rohani në një fjalim televiziv.
Sipas tij, Shtetet e Bashkuara duhet të rikthehen te marrëveshja bërthamore e vitit 2015. Nëse marrëveshja rikthehet tek ajo e vitit 2015, Irani mund të përmbushë përsëri detyrimet e tij. Ministri i Jashtëm i Iranit, Mohammad Javad Zarif tha se marrëveshja bërthamore me SHBA-të e Barack Obamës, “nuk ka vdekur”.
Por, Trump e anuloi marrëveshjen në mënyrë të njëanshme, duke nxjerrë sanksione të ashpra ekonomike kundër Iranit.
Megjithatë, në vend që të arrihej një marrëveshje midis palëve, Lindja e Mesme u futën një spirale përshkallëzimi të tensioneve e cila e arriti kulmin me vrasjen e gjeneralit iranian Kasem Sulejmani në fillim të këtij muaji./Fjala.al/
