Kryetari i zyrës për Kosovën në qeverinë serbe ka bërë të ditur se Beogradi paraqet projekte ekonomike konkrete në takimin e Uashingtonit me delegacionin e Prishtinës.
Marko Gjuriç theksoi se axhenda e bashkëpunimit ekonomik do të ndryshojë plotësisht marrëdhëniet mes serbëve dhe shqiptarëve. Ai shtoi se pret bisedime të vështira në Shtëpinë e Bardhë.
Ndërkohë ministri i Jashtëm, Ivica Daçiç, tha në Beograd se delegacioni i kryesuar nga presidenti, Aleksandër Vuçiç, nuk do të pranojë ultimatum nga Kosova.
“Nëse dikush mendon se mund të vendosë nën presion Serbinë me axhendë të fshehur, jam i bindur se Vuçiç do t’i përgjigjet duke mbrojtur interesin tonë shtetëror dhe kombëtar”, është shprehur ai për televizionin publik serb.
Gjithashtu shtoi se nuk pret që të arrihet një marrëveshje politike në Shtëpinë e Bardhë, pasi në këtë drejtim nuk është përgatitur asgjë. Ru. Do/ Fjala
