Marrëveshja e cila u konsiderua si historike mes Kosovës dhe Serbisë ka ngjallur një sërë reagimesh nga aktorët politikë kombëtarë dhe ndërkombëtarë, por jo vetëm.
Kryetari i Lidhjes Demokratike të Kosovës, Isa Mustafa deklaroi për KosovaPress se me këtë marrëveshje Kosova përfiton shumë si shtet dhe se është një hap më shumë drejt njohjes reciproke.
Ndër të tjera Mustafa është shprehur se Kosova ka kërkuar angazhim të fuqishëm të Shteteve të Bashkuara të Amerikës dhe se teoria që Hoti me këtë hoqi dorë nga sovraniteti janë broçkulla.
“Sa i përket pauzimit në anëtarësime për një vit në organizata ndërkombëtare, mendoj se kjo arsyetohet me faktin e një finalizimi kohor të përmbylljes së dialogut e cila fazë pastaj kurorëzohet me njohje reciproke dhe me anëtarësim në OKB. Çdo anëtarësim në organizata ndërkombëtare e kemi realizuar në bashkëpunim dhe koordinim me SHBA, prandaj edhe ky është një koordinim në proces. Teoritë se kryeministri Hoti me këtë hoqi dorë nga sovraniteti janë broçkulla”, ka thënë Mustafa, duke shtuar se ata që avancojnë këto teori nuk ia sollën Kosovës njohjen e një prej vendeve më të fuqishme, Izraelit, por ia solli SHBA dhe marrëveshja. /Ra.My.Fjala.al/
