Mblidhet pasditen e sotme Këshilli Politik për të diskutuar ndryshimet kushtetuese të miratuara në 30 korrik, me kërkesë të Partisë Socialiste.
Opozita konfirmon pjesëmarrjen në Këshillin Politik, i parashikuar për tu mbledhur në orën 18.00.
“Punë në mirëbesim dhe respektim i 2 marrëveshjeve”, janë dy kushtet e opozitës për të vijuar punën.
Po ashtu opozita kërkon paprekshmërinë e koalicioneve parazgjedhore si pjesë e marrëveshjes dhe listat e hapura 100%.
Në letër thuhet se marrja e vendimeve për çështje që prekin zgjedhjet, jashtë Këshillit Politik, në një proces të mbyllur dhe ku u përjashtua Opozita politike e vendit, dëmton stabilitetin demokratik të vendit dhe procesin e integrimit europian të Shqipërisë, duke akuzuar PS për shkelje të marrëveshjen politike të 14 janarit dhe zotimet e ndërmarra në marrëveshjen e 5 qershorit.
Nënvizohet se Opozita e Bashkuar i qëndron marrëveshjes së 5 qershorit dhe marrëveshjes së 14 janarit dhe, pavarësisht provokimeve të herëpashershme që bëhen nga ana e Partisë Socialiste, shprehet e palëkundur në vullnetin për respektimin e këtyre marrëveshjeve, si rruga e vetme për mbrojtjen e interesit të qytetarëve dhe pritshmërisë që ato kanë nga Reforma Zgjedhore.
Duke shprehur qëndrimin e detajuar bashkëlidhur shkresës, konfirmohet:
“Vijimi i punës në Këshillin Politik duhet të kryhet në mirëbesim mes palëve, duke respektuar Marrëveshjet politike të nënshkruara më parë, të 14 Janarit dhe 5 Qershorit, si dhe standartet e OSBE/ODIHR dhe Komisionit të Venecias. Nën këtë premisë, konfirmojmë pjesëmarrjen në mbledhjen e radhës, ditën e hënë, ora 18.00”./Bl.Ba/Fjala.al
