Dy vite më parë Kryeministri Edi Rama bëri ndryshime të rëndësishme në kabinetin qeveritar duke zëvendësuar një sërë ministrash. Ndër largimet më të bujshme ishte edhe ai i Lindita Nikolla-s nga posti i ministrisë së Arsimit.
Ajo që lëkundi më së shumti pozicionin e ministres ishte dhe vala e protestave që shpërtheu nga studentët asokohe. Menjëherë pas largimit të saj u njoftua se pasuesja do të ishte Besa Shahini, që në atë kohë mbante postin e Zv. ministres së Arsimit. Shahini erdhi me një CV të pasur profesionale në Kosovë, Gjermani dhe Kanada.
Megjithatë pas dy vitesh në qeveri edhe ministrja Shahini para disa ditësh njoftoi se nuk do të jetë pjesë e kabinetit të “qeverisë Rama”. Largimi i saj ishte i papritur dhe bëri menjëherë bujë në media.
“Jeta ime është pakëz e paqëndrueshme në Shqipëri, duke marrë parasysh që e gjithë familja jeton në Kosovë. Dhe ne përkundër gjithë afrimit që kemi bërë mes Kosovës dhe Shqipërisë prapë jemi dy shtete të ndara.
Në këto momente kur ka probleme sikur këto që jemi ballafaquar në Shqipëri, prapë së prapë e sheh se nëse jeton me familjen larg, në dy vende të ndryshme është pak e vështirë të mirëmbahet gjithë kjo pjesë e punës, që është një ngarkesë e madhe.
Por, unë natyrisht i kam thënë kryeministrit Rama që jam në dispozicion që të shërbej për aq kohë sa ende jam duke sjellë vlerë në ndërtimin e politikave arsimore dhe në zbatimin e tyre në qeveri”, u shpreh Shahini.
Ajo erdhi në një moment tepër kritik pas protestave të studentëve në dhjetor të vitit 2018. Por për pasuesen e Lindita Nikollës, një nga momentet delikate kanë qenë provimet e maturës që shkaktuan shumë polemika nga studentët për shkak të shkallës së vështirësisë së tezave.
Edhe pse ajo mori vendimin për tu larguar nga ky post të gjithë prisnin që Shahini të qëndronte deri në fund të mandatit.
Por ditën e sotme Kryeministri Edi Rama zhvilloi një takim me Shahinin dhe njoftoi se pasuesja e saj, do të jetë deputetja e PS, Evis Kushi.
Kjo la të kuptonte që Shahini do të largohet menjëherë nga posti i ministres së Arsimit. Ishte vetë kjo e fundit që tregoi se do të qëndronte deri në fund të mandatit, para disa ditësh ku ajo njoftoi largimin.
Megjithatë ai vendim i Shahinit shkaktoi shumë bujë në media dhe për këtë Kryeministri Rama vendosi që të largojë ministren menjëherë nga posti. Në krye të këtij posti u emërua Evis Kushi, deputetja e PS e cila ka një karrierë tepër të pasur në fushën e arsimit.
“Vlerësoj shumë gjithçka që ke bërë”– tha midis të tjerash kryeministri Rama, duke shprehur keqardhjen për largimin e Shahinit./Pa.Va/Fjala.al
