Nga Blerina Gjoka
Tryeza e rrumbullakët që uli palët politike këtë javë, ngrohu pak janarin, duke i dhënë shpresë se viti që sapo nisëm do të jetë viti i zgjidhjes së krizës politike që u konsumua përgjatë 2019-ës. Kjo tryezë kishte disa risi, por vetëm një premtim, edhe pse simbolika e një pakti të shumëpritur politik ishte më i madh se kaq.
Për herë të parë në tryezë nuk kishim vetëm dy palë ballë për ballë, siç ka ndodhur në të shkuarën në marrëveshjet mes Partisë Demokratike dhe Partisë Socialiste. Tryeza e stilit arturian ku garantohet baraspesha, uli edhe Lëvizjen Socialiste për Integrim, një parti që tashmë e ka konsoliduar veten si pol i tretë dhe shpesh vendimmarrës në aleancat e pushtetit dhe një palë të katërt, që lindi e u formësua vetëm vitin që shkoi, opozitën e re parlamentare, me deputeten Rudina Hajdari në krye.
Pakti i arritur kaq shpejt dhe thjesht u perceptua si një marrëveshje politike mes palëve. Kjo ngriti shumë pikëpyetje se pse ishte harxhuar një vit kohë në një krizë politike me protesta, bojkot zgjedhjesh dhe një kosto të lartë për vendin nga pikëpamja ekonomike e sociale, siç konstatojnë ekspertët.
“Kur ishte kaq e thjeshtë, pse nuk u bë më parë?”, – ishte kjo pyetja që u ngrit frikthi në mendjet e shqiptarëve.
Por, në fakt, ky pakt në vetvete nuk është asgjë më shumë sesa një pakt për t’u marrë vesh për një aspekt krejt teknik, siç është ai i reformës zgjedhore, që në të vërtetë nuk e zgjidh krizën, por vetëm sa e zbut atë në njëfarë mënyre. Pakte si ky i janarit partitë politike bëjnë pothuajse çdo katër vjet për ndryshimet në legjislacionin zgjedhor, që lindin si nevojë pas rekomandimeve të OSBE/ODIHR-it për problematikat zgjedhore të vërejtura në procesin zgjedhor.
Pra, pavarësisht nga simboli, tryeza e partive e la krizën politike sërish përpara nesh. Kjo marrëveshje në të vërtetë nuk na tregoi mekanizmat me të cilët do të duhej të dilej nga kriza e gjatë. Gjithsesi, dha mesazhin se gjërat po lëvizin për plotësimin e 9 kushteve të forta të vendosura nga Bundestagu, si një kushtëzim për ecjen përpara në procesin e çeljes së negociatave me Bashkimin Evropian.
Po a do të mundet që marrëveshja politike për reformën zgjedhore të krijojë mekanizmat për zgjidhjen e krizës, imponimin e zgjedhjeve të parakohshme dhe ndryshime të rëndësishme në standardet demokratike të zgjedhjeve?
Lexo edhe:
Kristaq Kume: Reforma zgjedhore duhet të prekë burimin e krizës politike
Lexo edhe:
Ylli Manjani: Kjo marrëveshje do të arnojë jorganin e vjetër
/Fjala.al
