Bardheblutë presin shortin e “play-off”-it të Ligës së Evropës duke shpresuar për një kundërshtar të kalueshëm. Ishte e pafat në atë humbje minimale në turin e dytë eliminator të Ligës së Kampioneve përballë Crvena Zvezdës, por fati më pas e përkëdheli, duke i kursyer përballjen e turit të tretë eliminator të Ligës së Evropës dhe e katapultuar direkt, së bashku me bullgarët e Ludogoretsit të Razgradit, drejt në vazot e shortit të fazës së “play-off”-it të veprimtarisë së dytë të klubeve të kontinentit.
Dhe duket se fati mund ta përkëdhelë sërish Tiranën, pasi janë njohur pak a shumë edhe kundërshtaret e mundshme të asaj që është edhe pengesa e fundit drejt një pjesëmarrjeje në fazën e grupeve të Ligës së Evropës për bardheblutë. Në fakt, gjithçka do të finalizohet para shortit të së premtes pasdreke, por tani për tani dihet se 25-herë kampionia e Shqipërisë mund të ketë përballë kundërshtarë të përballueshëm.
Për një kapriço të shortit, Tirana rrezikon një “bis”, një tjetër përballje me Crvena Zvezdën, por këtë radhë në veprimtaritë e dytë të klubeve të kontinentit të vjetër. Një tjetër kundërshtar i mundshëm është edhe skuadra kroate e Dinamos së Zagrebit, ajo zvicerane e Jang Bojs, ajo azere e Karabagut apo ajo bjelloruse e Dinamo Brestit.
Ndonëse ende nuk janë formalizuar ende, një kundërshtare e mundshme e skuadrës shqiptare janë gjigandja skoceze, Sëlltiku, por edhe skuadra polake e Legias së Varshavës, apo ajo rumune e Klujzhit. Të 3 këto të fundit janë kundërshtare të vështira, por, me pak fat, Tirana mund të përballet edhe me një skuadrës si ajo bjelloruse e Dinamo Brestit, një ekip që po kalon një krizë financiare që ka ndikuar në ecurinë sportive të ekipit.
Tirana, me sytë nga përkëdheljet e shortit, përvijohen kundërshtaret e mundshëm
