Bëhet fituesi i 6-të i ndryshëm në këtë sezon, i gjithë podiumi foli spanjisht. Në një garë që ka dhuruar emocione nga fillimi deri në fund, Maverik Vinjales ka triumfuar në garën e së dielës në Çmimin e Madh të Emilja-Romanjës në Moto GP, që u zhvillua të dielën dhe, sikundër të gjitha garat e e këtij sezoni u soll për sportdashësit drejtpërdrejt në Rrjetin e Radio-Televizionit Shqiptar.
Maverik Vinjales korri fitoren e parë në këtë sezon të nivelit më të lartë të Botërorit të Motoçiklizmit, Moto GP, pasi një rrëzim në fund i kryesuesit për shumë xhiro, Françesko Banjajës, i dhuroi pilotit të “Jamaha”-s zyrtare kreu e podiumit në Çmimin e Madh të Emilia Romanjës.
Vinjales vuajti duke u nisur nga vendi i parë në garën e parë që u mbajt po në pistën e Mizanos fundjavën e shkuar, për shkak të zgjedhjes së gabuar të gomave, por një ndryshim në përgatitjet e garës së të dielës nënkuptoi se ai ishte shumë më i fortë që nga nisja. Ai mori kryesimin në nisje, teksa parakaloi në kthesën nr. 4 Xhek Millerin, i cili nga ana a e tij u dorëzua në xhiron e 8-të pas një problemi në motor.
Piloti tjetër i “Dukati”-t klient të “Pramak”-ut, e parakaloi spanjollin e “Jamaha”-s po në kthesën nr. 4 në xhiron 6-të, duke vijuar ta thellojë kryesimin, teksa prapa tij u rrëzuan me radhë Brad Binderi, Valentino Rosi e të tjerë.
Por teksa Banjaja shkoi deri në 1.4-1.6 sekondë kryesim kundrejt Vinjalesit, Pol Espargaro dhe Fabio Quartararo bënë një sulm të ashpër për të arritur podiumin. Por kthesa e 6-të e xhiros së 21-të do të rezultonte fatale për italianin e “Dukati Pramak”-ut, i cili u rrëzua, duke ia dorëzuar kështu kryesimin Vinjalesit, i cili nuk e lëshoi më, duke u bërë fituesi i 6-të i ndryshëm në këto 7 gara të këtij sezoni dhe duke u rikthyer në garën për titull.
Beteja për vendin ishte e ethshme, por ishte piloti i “Suzuki”-t, Joan Mir, ai që e fitoi atë, edhe pse e nisi garën nga vendi i 11-të, ndërsa vendin e 3-të në garë e mori Fabio Kuartararo, i cili u detyrua t’ia linte shkallën më të ulët të podiumit Pol Espargarosë, sepse francezi i “Jamaha”-s kliente të “Petronas”-it shkeli më shumë se ç’lejohej kufizimet e pistës dhe nuk respektoi kryerjen e ndëshkimit. Përfundimisht, i gjithë podiumi i garës italiane foli spanjisht.
La.Mi/Fjala.al
