Pak ditë më parë, gazetarja Blerina Gjoka më telefonoi dhe më kërkoi një intervistë për një gazetë të re që do quhej Fjala.
U intrigova të them të drejtën për dy arsye të atëçastshme: së pari ç’është kjo nismë për gazetë print në këtë kohë të vështirë për printin dhe, së dyti ç’është ky emër “Fjala”?!
Nuk e pyeta më gjatë Blerinën, sepse më erdhi zor, po pa e zgjatur i dhashë opinionin tim për reformën zgjedhore që medemek po bëhet.
Më duhet të pranoj që ishte ndjesi e veçantë që një gazetë e printuar për herë të parë që gjendej në faqen e saj të parë edhe emri im. Besojeni ose jo, por është një emocion edhe kjo.
Nejse, desha t’i uroj sukses kësaj gazete për sipërmarrjen e saj në këtë kohë të vështirë ekonomike dhe mbi të gjitha demokratike. Fjala, ajo e vërteta, është bërë e vështirë e për pasojë shumë e kushtueshme. Pushteti e politika që jetojnë me fjalën, duan t’ja ulin vlerën duke i rritur taksën. Taksa e fjalës është më e rënda që mund t’i vendoset një shoqërie. Le pastaj një shoqërie demokratike!!
Meriton një sukses të madh pra nisma e Fjalës, dhe një lutje të gjatë që ajo, pra gjithmonë Fjala të mos spërdridhet e as përdoret si “plumb për armikun”. Uroj shumë që Fjala mbi të gjitha të jetë e LIRË, siç e keni vënë dhe në logon Tuaj!
Uroj që plumbi i tharë në letrën e Fjalës t’ja vlejë për të shëruar shoqërinë demokratike nga terri informativ i lajmeve të blera dhe i lajmeve për klikim.
Fjalën e merr edhe era, por e gdhendur në letër jo dhe aq kollaj. Prandaj uroj që ajo letër të jetë e vërteta!
Mendova t’i ndaj me ju të Fjalës këto dy fjalë.
