Ministrja e Shëndetësisë, Ogerta Manastirliu reagoi ndaj akuzave të opozitës për numrin e ulët të testimeve. E ftuar në emisionin OPEN, ministrja u shpreh se vendi ynë duhet të krahasohet me veten dhe jo me shtetet e huaja.
Sipas Manastirliut ka patur rritje të vazhdueshme të testimeve, ndërsa insistoi se vendimin për testimet e marrin ekspertët dhe jo qeveria.
“Numri i testimeve nuk është një numër që vendoset nga qeveria, por një strategji që miratohet nga një ekip ekspertësh. Testimi nuk është një qëllim në vetvetë. Opozita e ka shumë qef krahasimin, është krahasur me Gjermaninë dhe ka dalë e dyta. Të krahasohemi me veten tonë, sa testime bënim në qershor dhe sa në shtator.”, tha Manastirliu.
Më tej ajo shtoi se Shqipëria është më mirë se vendet e Rajonit dhe disa vende të Europës, referuar shifrave të COVID-19.
“Bilancet duhen bërë në fund të luftës. Kemi numrin më të ulët të infektimve krahasur me vendet europiane dhe të rajonit. Për fatalitetet nga COVID, vetëm Serbia është më mirë se ne. Koronavirusi nuk është zhdukur. Situata është serioze, nuk mund të themi jemi mirë. Por po e menaxhojmë mirë situatën. Fatalitetet na dëmtojnë të gjithëve. Po mbajmë nën kontroll kurbën”, theksoi ministrja.
Pa.Va/Fjala.al
