Shtyhet sërish seanca gjyqësore për Emiliano Shullazin dhe 4 të pandehurit e tjerë. Si shkak i shtyrjes këtë herë është bërë mungesa e një përgjigje nga Këshilli i Lartë Gjyqësor.
Disa minuta para nisjes së seancës së sotme,KLGJ iu drejtua Gjykatës së Posaçme të Apelit se ende nuk është marrë një vendim dhe se Këshilli është duke punuar.
Gjykata e Apelit Kundër Korrupsionit dhe Krimit të Organizuar u shpreh se do ti drejtohej KLGJ për të dhënë një vlerësim se çfarë do bëhet me gjyqtarët e deleguar nga rrethet që sipas avokatëve, nuk mund të jenë pjesë e trupës pasi nuk janë gjyqtarë të posaçëm, që më 30 qershor. Dakord me këtë problem ishin edhe prokurorët, të cilët thanë që duhet të shprehet KLGJ.
Me fillimin e funksionimit të gjykatave të posaçme në datën 19.12.2019, në zbatim të Vendimit nr.30, datë 14.02.2019, “Për rregullat dhe procedurën e caktimit të gjyqtarit për gjykimin e një çështje gjyqësore të veçantë, në një gjykatë tjetër, të ndryshme nga ajo ku ushtron funksionin në mënyrë të përhershme”, Këshilli i Lartë Gjyqësor ka caktuar gjyqtarë nga gjykatat me juridiksion të përgjithshëm, por që ndeshen me çështjen e përmbushjes së kushtit të sigurisë, të parashikuar në Ligjin nr.95/2016 “Për organizimin dhe funksionimin e institucioneve për të luftuar korrupsionin dhe krimin e organizuar”, siç është dhënia e pëlqimit për rishikimin periodik të llogarive financiare dhe telekomunikimeve vetjake, për vete dhe për të afërmit e tyre. /Fjala.al
