Policia ka dhënë detaje në lidhje me ngjarjen e rëndë që tronditi sot në mëngjes Himarën, ku u ekzekutua biznesmeni Niko Goro.
Ngjarja ka ndodhur rreth orës 08.55 minuta në vendin e quajtur rreth-rrotullimi që të çon në lagjen Spille.
Burime policore bëjnë me dije se e plagosur ka mbetur dhe një femër, 57-vjeç, me inicialet E.Q., e cila ka marrë një plumb në këmbë, por fatmirësisht ndodhet jashtë rrezikut për jetën.
Mësohet se biznesmeni Niko Goro, 51 vjeç, është djali i xhaxhait të kryebashkiakut, Jorgo Goro dhe është ekzekutuar me armë zjarri në shëtitoren e qytetit.
Goro u ekzekutua sapo doli nga supermarketi në pronësi të motrës së tij. Dyshohet se autorë të kenë qenë 4 persona, të cilët ishin duke lëvizur me një furgon, kur njëri prej tyre ka zbritur dhe ka qëlluar në drejtim të Goros me breshëri kallashnikovi.
Nisur nga skema se si është ekzekutuar 51-vjeçari mendohet të kemi të bëjmë me një atentat të mirëorganizuar ku shënjestra ka qenë pikërisht ai.
Zona është e pajisur me kamera sigurie, çka mund të ndihmojnë në zbardhjen e kësaj ngjarjeje të rëndë, si edhe identifikimin e autorëve.
Nuk dihen ende shkaqet e kësaj ngjarjeje të rëndë, por mësohet se Goro ka pasur disa probleme me çështjen e pronave, megjithatë nuk dihet ende nëse ka qenë ky motivi i ekzekutimit.
Janë ngritur pika kontrolli në aksin rrugor Himarë – Borsh e Himarë – Vlorë. Në ndihmë të Policisë Vendore janë nisur forcat Operacionale dhe Shqiponjat e DVP Vlorë.
Në vendngjarje ka shkuar grupi hetimor dhe nën drejtimin e Prokurorisë po vijon puna për zbardhjen e rrethanave të ngjarjes, identifikimin dhe kapjen e autorëve./Bl.Ba/Fjala.al
