Ka përfunduar para pak minutash, takimi te Ministria e Financave, mes përfaqësuesve të Ligës Profesioniste dhe qeverisë.
Në prononcimin pas këtij takimi, deputeti Fidel Ylli u shpreh për mediat se ishte një takim ku në të shumtën e rasteve problemet e Ligës thuajse janë të zgjidhura, ndërsa ka ngelur vetëm problemi i Ligjit të Sponsorizimit.
“Ministria ishte shumë bashkëpunuese sot. Kërkohet një konfirmim edhe nga qeveria për faljen e gjobave. Në qoftë se do të bëhet kjo, do të bëhet me një ligj specifik në parlament. Kërkon një vendim politik, nuk mund të bëhet një falje vetëm për Ligën apo për futbollin, por do bëhet për të gjitha bizneset”, u shpreh Ylli.
Më tej ai sqaroi se do të jetë një vendim që sportit do t’i vlejë për një afat të gjatë. “Debatet sjellin zgjidhen e problemit, jam i bindur që kjo situatë do të zhbllokohet shumë shpejt. Kur flitet për financat, gjithë ministrat dhe këshilltarët debatojnë.
Jemi në një vit të vështirë, tërmet, pandemi, biznese të rrënuara dhe qeveria ka vështirësi të mëdha. Janë zgjidhur 90% e kërkesave, ka ngelur vetëm Ligji i Sponsorizimit. Ka 2 variante, varjani jonë dhe i Ligës. Të dyja variantet konvergojnë, vetëm duhet gjetur modaliteti se si do zgjidhet”, tha Fidel Ylli./Bl.Ba/Fjala.al
