Sebastian Fetel akuzon “Ferrari”-n se i ka dhënë një makinë jokonkurruese. Por drejtuesi i skuadrës së “Maranelos”, Matia Binoto, qartëson: “Nuk janë makinat e ndryshme, por dëshirat e pilotëve për të dhënë maksimumin në garë”.
Kjo replikë vjen pas paraqitjes aspak të mirë të Fetelit në garën e Portugalisë. Duket se nuk ka paqe për “Ferrari”-n në këtë Botëror, duke filluar nga kënaqësitë e rralla, si ai vend i katërt i Sharl Lëklerkut në pistën e Portimaos, e deri te zhgënjimet e shumta të vërejtura në këtë sezon.
Por situatën pas garës së fundit në Portugali, e kanë acaruar më shumë, dyshimet e ngritura nga Sebastian Fetel, për diferencat që ekzistojnë midis “SF1000”-ës së tij dhe makinës së shokut të skuadrës. Një bashkëudhëtim prej 6 vitesh me “Ferrari”-n, si ai i gjermanit, gjatë të cilit ka patur shumë kënaqësi të ndërsjella, tani për tani është në stadin e të thënit që “të mbarojë sa më shpejt”. Mbi të gjitha, nëse ndërlikimet dhe ankesat e një Botërori, dalin nga kabina e “njëvendëshes” dhe kalojnë te mikrofonët.
Në Portimao, gjermani nuk ka qenë i kënaqur nga rendimenti i tij standard, si në prova zyrtare, ashtu edhe në garë. Duke qenë gjithnjë prapa në krahasim me paraqitjen e Sharl Lëklerkut. E në një mënyrë të pashpjegueshme Sebastiani hedh dyshimin për ndryshimet e mundshme midis dy makinave të kuqe. Madje është shprehur se kjo makinë “Ferrari” është e vështirë të drejtohet. Por shumë qetësuese ka qenë përgjigja e Matia Binotos.
“Asnjë lloj diference midis makinave të Lëklerkut dhe Fetelit nuk do ta justifikonte humnerën që i ndan të dy pilotët në klasifikimin e përgjithshëm: 75 pikë për pilotin nga Monako, i 5-ti në renditje, e 18 për gjermanin, i 13-ti. Shpresoj dhe uroj që në Imola, Sebastiani të arrijë të kualifikohet në një vend më të mirë”, ka thënë Binoto.
Por e rëndësishme është se, në dy faza të ndryshme të karrierave të tyre, të dy pilotët, kanë reaguar në mënyra të ndryshme në këtë sezon mediokër të “Ferrari”-t.
Lëklerku duke kërkuar të fitojë sa më shumë përvojë, ndërsa Feteli duke parë tashmë nga e ardhmja.
la.mi/Fjala.al
