Pamjet dramatike që transmetoi së fundmi BBC nxori në dritë dramën e vërtetë që ndodh me fëmijët e refugjatëve.
Fëmijët kanë arritur deri në atë pikë sa tentojnë vetëvrasjen në kampin famëkeq të Morias në ishullin grek të Lesvos.
Gjithashtu, edhe televizioni shtetëror zviceran transmeton një kronikë të re televizive për gjendjen tragjike dhe kushtet ç’njerëzore në kampin e ishullit të Samos.
Deri më tani numërohen mbi 8000 refugjatë dhe emigrantë, fakt që ka bërë që tashmë banorët e ishullit të mos t’i ndihmojnë më ata dhe të kërkojnë prej organeve lokale largimin e tyre.
“Realisht ky kamp është një qytet i dytë. Kur në 2015-ën filloi kriza me sirianët, banorët ndihmonin, por tashmë gjërat kanë ndryshuar pasi është zvogëluar numri i sirianëve dhe është rritur numri i atyre që vijnë nga Afrika apo vende ku nuk ka luftë”, thotë Georgios Dionisiou, zëvendëskryetar bashkie, transmeton Top Channel.
Sipas të dhënave nga OKB, numri i refugjatëve që kanë hyrë në Greqi këtë vit ka shkuar në rreth 69000 vetë, ndërsa në Itali kanë hyrë vetëm 1500.
