Ekspertja e Institutit të Shëndetit Publik, Eugena Tomini ka deklaruar këtë të shtunë se të gjithë pacientët që do të shkojnë te spitalit i hapur ditën e sotme, COVID-3, do të jenë pacientë që kanë qenë të trajtuar te spitalet COVID-1 dhe COVID-2, por që vijojnë të kenë nevojë për trajtim.
“Te Covid-3 mund të shtrohen edhe pacientë që kanë nevojë për terapi intensive. Te Covid-3 do të shkojnë raste të rënda, që kanë kaluar nga Covid-1 dhe Covid-2, por që vijojnë të kenë nevojë për trajtim spitalor. Drejtues i këtij spitali është prof. Arjan Harxhi”, tha Tomini.
E pyetur nëse spitalet rajonalë do të hyjnë në funksion për të trajtuar të prekurit me Covid-19, gjatë intervistës në rubrikën ‘Opinion’ në News24, Tomini u shpreh se nëse infektimet do të rriten gjatë periudhës së dimrit, do të hyjnë në lojë dhe 5 spitale rajonale, ai i Shkodrës, Durrësit, Fierit, Korçës etj.
“Kemi diskutuar që janë katër spitale covid, që do të jenë në angazhim kundrejt pandemisë. Por, ndërkohë do të hyjnë në lojë edhe spitale të tjera. Nëse numri i infektimeve do të shtohet gjatë dimrit, sigurisht që do të hyjnë në lojë edhe 5 spitale rajonale, ai i Shkodrës, Durrësit, Fierit, Korçës, etj. Pas ezaurimit të katër spitaleve në Tiranë, do të hyjnë 5 spitale rajonale, e më tej edhe 5 spitale të tjera.”, u shpreh Tomini.
Ekspertja Tomini u shpreh se opsioni që Shqipëria të shkojë në një karantinë të dytë është opsioni i fundit, pasi të ezaurohen të gjitha opsionet e tjera.
“Sigurisht që merren të gjithë opsionet e mundshme për minimizimin e virusit. Karantina dha efekte shëndetësore, psikologjike, ekonomike. Mbetet një opsion i fundit. Do të ezaurohen të gjitha opsionet e tjera më parë, dhe në fund do të shihet. Do të shihet ezaurimi i spitaleve dhe rritja e numrit, të cilët do të na detyrojnë për hapa të mëtejshëm.”, shpjegoi Tomini.
Kujtojmë se autoritetet vendase kanë vendosur që lokalet e Bllokut të mbyllen pas orës 22:00 pasi cilësohet si një burim infeksioni. Ndërsa për të përballuar fluksin e personave të infektuar që kanë nevojë për trajtim, ditën e sotme u hap spitali COVID-3 i cili ndodhet në QSUT./r.g/Fjala.al
