Përtej valës së “Covid-19”, turneu kontintal do të mbahet, Kosova synon medalje. Rritja e rasteve me koronavirus në gjithë Evropën ka vënë në dyshim mbajtjen e ngjarjeve sportive të planifikuara për dy muajt e fundit të vitit dhe të rrezikuara janë edhe disa turne të xhudos.
Por në fundjavë Presidenti i Federatës Evropiane të Xhudos (EJU), Sergej Solovejçik, ka konfirmuar se Evropiani i Xhudos për Të Rritur do të mbahet ashtu si është planifikuar, prej 19 deri më 21 nëntor 2020 në kryeqytetin e Republikës Çeke, Pragë.
Ky lajm është mirëpritur edhe nga xhudistët kosovarë. Pas muajsh të tërë me stërvitje e pa gara, ata janë kthyer në tapet muajin e kaluar, në “Grend Slem”-in e Budapestit. Ay ku Distria Krasniqi e Loriana Kuka fituan medalje, ndërsa gara shërbeu më shumë për të testuar formën dhe si përgatitje për Evropianin. Për shkak të epidemisë së virusit “Covid-19”, janë shtyrë Lojërat Olimpike “Tokio 2020”, ndërsa Botërori, me gjithë përpjekjet e bëra, nuk do të mbahet.
Kështu që Evropiani mbetet gara e vetme e madhe për këtë vit. “Me gjithë situatën e vështirë në Evropë, e sidomos në Republikën Çeke, ku ka shpërthyer një valë të re të infeksionit, Komiteti Ekzekutiv i EJU-së ka vendosur të mbajë Kampionatin Evropian për Të Rritur, – ka deklaruar ndër të tjera kreu i xhudos evropiane, Solovejçik. – Ne kemi vendosur kështu për shumë arsye. Lojërat Olimpike mbahen vitin tjetër dhe ne jemi të detyruar të përgatisim sportistët evropiane për ngjarjen kryesore të jetës së tyre.”
“Kjo është e pamundur pa pjesëmarrje në gara të nivelit më të lartë. Po ashtu, ne marrim shembull nga organizimi i “Grend Slem”-it në Budapest. EJU-ja, së bashku me Federatën çeke janë të gatshme për të ofruar siguri për të gjithë pjesëmarrësit”, – ka përfunduar ai.
Ndonëse Majlinda Kelmendi nuk pritet të marrë pjesë Kosova pritet të paraqitet me një ekip më i madh në Evropian. Distria Krasniqi e Loriana Kuka vlerësohen pretendente për medalje, pas suksesit në Budapest.
Por edhe Nora Gjakova e Akil Gjakova pretendojnë medalje, ndërsa nuk përjashtohet ndonjë tjetër sportist që mund të dhurojë të papritura. Në Evropian pritet të garojnë edhe Laura Fazliu, Flaka Loxha dhe japonezi i natyralizuar, Shigeki Nakamura./Bl.Ba/Fjala.al
