Në raportin e fundit të publikuar nga Transparency International, Shqipëria rezulton si vendi më i korruptuar në Ballkan dhe i treti më i korruptuar në Evropë, duke lënë pas vetëm Moldavinë dhe Ukrainën.
OSBE ka reguar për raportin ku Shqipëria ka humbur 7 pozicione nga një vit më parë. Në reagim theksohet se mbetet shqetësuese prirja negative në Shqipëri në luftën kundër korrupsionit.
“Vërejmë me keqardhje vijimin e përkeqësimit të perceptimit publik ndaj korrupsionit në vend, siç dëshmon Indeksi më i fundit i Transparency International, rezultatet e të cilit u botuan sot. Shqipëria shënoi një pikë më pak në krahasim me vlerësimin e vitit 2018, duke humbur shtatë vende në klasifikimin global. Prirja e përgjithshme negative në rajonin e Evropës Juglindore, përfshirë Shqipërinë, sa i përket luftës kundër korrupsionit mbetet shqetësuese”, thuhet në reagimin e OSBE.
OSBE bën thirrje për vazhdimin e reformës në drejtësi dhe realizimin e një reforme zgjedhore sa më gjithëpërfshirëse.
“Në dritën e gjetjeve të Transparency International, Prezenca e OSBE-së u bën thirrje institucioneve publike dhe organeve ligjzbatuese të vijojnë zbatimin e reformës në drejtësi dhe atyre kundër korrupsionit, të sigurojnë integritet dhe transparencë më të madhe institucionale në shpenzimet publike, si dhe të zgjerojnë hapësirën për pjesëmarrjen e shoqërisë civile në monitorim të pavarur.
Meqenëse analiza mbarëbotërore e Indeksit për Perceptimin e Korrupsionit këtë vit thekson nevojën për adresimin e korrupsionit në zgjedhje, përsëritim thirrjen tonë për reformë zgjedhore të plotë dhe gjithëpërfshirëse për zbatimin e rekomandimeve të OSBE/ODIHR-it, përfshirë ato lidhur me financimin e partive dhe të fushatave zgjedhore”, thuhet në deklaratë.
Nga 180 vende të marra në shqyrtim, Shqipëria rendit në vend të 106 sa i përket nivelit të korrupsionit. Të gjithë fqinjët tanë kanë një performancë më të mirë në luftën kundër korrupsionit, ndonëse vihet re një përkeqësim vitin e fundit.
