Pavarësisht kërkesës së vazhdueshme nga Uashingtoni, për heqjen e taksës 100%, Ramush Haradinaj nuk është lëkundur.
Kërkesa është bërë së fundmi edhe nga Richard Grenell, i dërguari i presidentit Donald Trump për dialogun Kosovë-Serbi, por kryeministri i Kosovës deklaroi sot në emisionin “Open” në Top Channel, se taska do të hiqet vetëm nëse Beogradi pranon pavarësinë.
“Nuk mund të hiqet taksa pa pasur një marrëveshje me Serbinë. Ai duhet të na sjellë një marrëveshje te konsoliduar me Serbinë dhe e heqim taksën. Po unë e heq taksën kur Vuçiç të njohë Kosovën. Nuk e heq taksën për të fituar zgjedhjet Vuçiç në pranverë. Në qoftë se Serbia njeh Kosovën unë tani bëj mbledhje qeverie dhe e heq taksën”, tha Haradinaj.
I pyetur nëse ky qëndrim i ka sjellë pasoja Kosovës, Haradinaj mohoi duke theksuar se “sot ne kemi bashkëpunime në aspektin e sigurisë me SHBA”, ndërsa marrëdhëniet me Gjermaninë janë edhe më të mira.
