Deputeti Andi Përmeti ka fituar pas 61 ditësh betejën e vështirë me koronavirusin. Ai ka ndarë në rrjetet sociale një foto krah të shoqes ku shprehet se tashmë mund të festojnë ditëlindjen e saj dhe triumfin përballë COVID-19. Përmeti thotë se ajo ia doli që mes ankthit dhe frikës ta mbante me shpresë se asgjë e keqe nuk do të ndodhte.
“Tashmë mund të festojmë! Gëzuar ditëlindjen Fjona! U bëfsh 100 vjeç. Tashmë mund të festojmë, jo vetëm ditëlindjen tende por edhe fitimin e betejës 61 ditore ndaj Covid-19. Një betejë e luftuar dhe e fituar nga të dy.
Përditë, pranë meje, duke më mbushur me buzëqeshje dhe gënjeshtra të bardha se sa mirë isha dhe se sa po përmirësohesha ndërsa maska dhe veshja anti-Covid të mbulonin frikën e ndonjë lajmi të kobshëm që mund të merrje nga momenti në moment.
Ti i’a dole mes ankthit dhe frikës të më mbaje me shpresë, që asgjë e keqe s’do të më ndodhte dhe unë e fitova betejën time i mbushur me guxim nga shpresa që ti më jepje përditë duke më qëndruar pranë! Fitorja e betejës ishte e imja po aq sa e jotja. Së bashku i’a dolëm. Tashmë mund të festojmë! Gëzuar!”, shkruan Andi Përmeti.
Prej afro dy muajsh Përmeti qëndroi në Turqi ku ndodhej në terapi intensive në luftë për jetën. Ai u negativizuar nga virusi pak javë më parë por vazhdoi trajtimin e veçantë mjekësore për shkak të pasojave të COVID./Bl.Ba/Fjala.al
