Reshjet e dendura të dëborës të mërkurën në darkë kanë krijuar probleme serioze në Parkun Kombëtar të Valbonës, në rrethin e Tropojës.
Burime për Fjala.al thanë se kjo zonë turistike prej disa ditësh është pa energji elektrike, për shkakun se dëbora ka rrëzuar shtyllat dhe ka këputur linjat e energjisë, duke krijuar probleme të theksuara për mbarëvajtjen e turizmit në zonë.
Të njëjtat burime treguan se kjo është një gjendje shqetësuese për biznesin agro-kulturor dhe malor në zonë, pasi mungon një strategji afatgjatë për përmirësimin e qëndrueshëm të infrastrukturës në muajt e dimrit.
Mësohet se Valbona në këtë sezon është një destinacion turistik i frekuentuar nga turistët, por siç duket mungesa e energjisë elektrike dhe indiferenca e autoriteteve lokale dhe qëndrore e ka vështirësuar jo vetëm klimën e biznesit në zonë, por edhe jetën e banorëve të kësaj krahine.
Kujtojmë se dy ditë më parë Fjala.al denoncoi faktin se prej tre ditësh Parku Kombëtar i Valbonës ishte pa energji elektrike, ndërsa banorët shprehnin shqetësimin serioz për falimentim të aktivitetit të tyre ekonomik.
Kujtojmë se Parku Kombëtar i Valbonës u mbulua nga dëbora në ditët e para të dhjetorit, duke ofruar një peizazh mahnitës jo vetëm për turistët vendas, por edhe ata pak të huaj që arritën të vizitojnë vendin tonë./Fjala.al/
