E.K 19 vjeçar është vrarë sot pas një sulmi me thikë në Prizren, krimin e rëndë dyshohet se e kryen dy vëllezërit, H.S 24 vjeç dhe SH.S, 26 vjeç. Policia e Prizrenit përmes një komunikate për mediat ka konfirmuar se rasti ka ndodhur pasditen e djeshme diku rreth orës 16:00.
“Me datë 26 janar 2020, rreth orës 15:52 minuta, policia rajonale e Prizrenit fillimisht ka pranuar një informacion për një person me lëndime në qendrën emergjente në Prizren. Pasi policia ka dalë në vendin e ngjarjes dhe duke e trajtuar rastin, ka pranuar informatën se personi i lënduar ka ndërruar jetë. Viktima është E. K mashkull, i moshës 19 vjeçare”!
Pas marrjes së informacioneve të para, policia ka nisur verifikimin e personave që kanë patur sherr me viktimën e për pasojë kanë arritur në konkluzionin se bëhet fjalë për dy vëllezër si autorë të krimit të rëndë. Ata janë arrestuar në kushtet e flagrancës dhe sipas të dhënave policore të Prizrenit, djemtë në momentin e prangosjes kishin me vete edhe dy thika.
Trupi i pajetë i të riut është çuar në institutin me Mjekësisë Ligjore për të mësuar më shumë hollësi, ndërsa prokuroria ka mundësuar urdhrin e ndalimit dhe të verifikimit për 48 orë për dy të rinjtë e ndaluar.
Vrasja në Suharekë
Sipas të dhënave të policisë kosovare bëhet me dije se një person është vrarë mbrëmë në fshatin Maqiteve, Komuna e Suharekës. Viktima mësohet se ishte 44vjeç dhe sipas policisë ka vdekur si pasojë e plagëve të marra nga një armë zjarri. Me datën 26 janar 2020 rreth orës 21:53 minuta, policia ka marrë një informacion për një rast vrasje me armë zjarri në fshatin Maqiteve, Komuna e Suharekës. Në vendin e ngjarjes kanë dalë njësitë policore dhe emergjenca dhe nga mjeku kujdestar është konfirmuar se viktima nuk ka shenja jete.
Gjithashtu në vendin e ngjarjes ka dalë njësiti i specializuar i hetimeve rajonale dhe prokurori i Shtetit. Është bërë këqyrja e vendit të ngjarjes dhe janë gjetur e sekuestruar në cilësinë e provës materiale 6 gëzhoja të zbrazura nga një armë dhe 4 pjesë metalike që dyshohet se janë të predhave të plumbit! Ndërsa gjatë bastisjes se shtëpisë dhe automjetit të personit të dyshimtë policia ka gjetur edhe armën e tipit pushkë, gjysmë automatike, me 2 fishek dhe 2 gëzhoja me të cilën dyshohet se është kryer krimi.
Viktima është Sh. K i lindur në vitin 1976. Ndërsa i dyshuari është një person me inicialet S.A i moshës 40 vjeçare. Sipas të dhënave ai ka qenë nën efektet e alkoolit kur e ka kryer krimin e rëndë pas të dy personat kanë qenë bashkë. n.k/Fjala.al/
