Autoriteti Rrugor Shqiptar i ka bërë thirrje drejtuesve të mjeteve që të lëvizin me kujdes dhe të respektojnë të gjitha rregullat e qarkullimit rrugor në aksin e Valbonës.
Ditët e fundit e gjithë zona është përfshirë nga reshjet e dëborës, ndërsa vijon puna për pastrimin e rrugës që kalon në një prej terreneve më të vështira malore.
Për të shmangur aksidentet për shkak të ngricave në rrugë, drejtuesit duhet të mos bëjnë manovra shpejtësie apo të bëjnë parakalime të shpejta dhe të gabuara.
“Në aksin e Valbonës aktualisht punohet për zgjerimin e rrugës dhe përmirësimin e mëtejshëm të situatës nga bora, për të siguruar kushte sa më optimale për qarkullimin e mjeteve, pavarësisht se rruga kalon në një nga terrenet më të vështira malore.
Gjithsesi ju lutemi të zbatoni rregullat e qarkullimit rrugor dhe të lëvizni me kujdes”, njofton ARRSH.
