Në emisionin Real Story në News 24 ka patur replika të forta midis gazetarit Eni Ferhati dhe deputetes së PS, Ermonela Felaj, e cila është edhe kryetare e Komisionit të Sigurisë. Teksa po diskutohej për paketën “AntiKÇK”, që synon luftën kundër krimit të organizuar, Felaj tha se persona të rrëzikshëm të dënuar edhe me burgim të përjetshëm kanë përfituar nga gjyqtarë të caktuar dhe hapësira ligjore.
Por ky konstatim i deputetes së PS është kundërshtuar nga gazetari Ferhati, i cili theksoi se shumë kriminelë kanë përfituar edhe nga amnistitë e Qeverisë.
“Ka patur gjithnjë një dispozitë ku përjashtoheshin veprat e rënda kriminale”, tha Felaj, por Ferhati theksoi se “vetëm në amnistinë e fundit ka ndodhur kjo”, duke shtuar se mungesa e kësaj dispozite në amnistitë e kaluara është pranuar edhe nga Etilda Gjonaj, ministre e Drejtësisë.
Sa i përket paketës “AntiKÇK”, gazetari tha se “sot u janë shpërndarë formularët disa individëve dhe u është lënë kohë 48 orë për ta plotësuar”. Aty do duhet të deklarojnë pasuritë e tyre dhe burimet e financimit.
