Pas Lulëzim Berishës duket se asnjë person tjetër i konsideruar killer nuk do të mbetet pas hekurave. Tani radhën e ka me sa duket Aleksandër Kuqo, i njohur për një seri krimesh të rënda dhe i dënuar nga Italia me burgim të përjetshëm. Që nga vrasjet e deri tek trafiku i femrave, Kuqo është një nga emrat më të njohur të botës së krimit në vend. Por, prej shumë kohësh është bërë përpjekje që ai të lërë qelinë, pasi sipas gjykatës ai vuan nga një sëmundje e rëndë dhe se i duhet gruaja ta ndihmojë.
Kështu është Gjykata e Fierit që po përgatitet të nxjerrë nga burgu një person të njohur si ‘i tmerrshmi i Beratit’ ose ‘i forti i Beratit’, Aleksandër Kuqo. Në vitin 2001, Aleksandër Kuqo, u dënua me 21 vite burg nga gjykata Fier, pasi u arrestua në Shqipëri për llogari të drejtësisë italiane. Mbi Aleksandër Kuqon rëndojnë dhjetëra akuza nga drejtësia italiane, e cila në vitin 1999 e ka dënuar me burgim të përjetshëm për akuzat e “vrasjes me paramendim në bashkëpunim”, “armëmbajtjes pa leje të armëve luftarake” dhe “trafikimit të femrave për prostitucion në bashkëpunim”. Sipas të dhënave mësohet se vendimi i Gjykatës së Fierit, që e konvertoi vendimin italian në 21 vjet heqje lirie, në atë kohë u përfol dhe u konsiderua si një skandal i drejtësisë shqiptare.
Aleksandër Kuqo u riarrestua më datën 6 maj të vitit 2006, nga Policia e Beratit për llogari të Prokurorisë së Fierit dhe në atë urdhër përcaktohej prangosja e Kuqos “për ekzekutimin e vendimit penal nr.13, datë 22 janar 2003, dhënë nga Gjykata e Shkallës së Parë, Fier, për caktimin e masës mjekësore ndaj Aleksandër Kuqos”.
Sipas të dhënave më të fundit mësohet se ditën e martë, në seancën e zhvilluar në Gjykatën e Fierit, gjykata thekson duke qenë se nga ana e ekspertëve është rekomanduar masa mjekësore ‘mjekim i detyruar ambulator’, në kujdes të një familjari, dhe është e nevojshme marrja e mendimit dhe pëlqimit në bazë të nenit 46, të një familjari në lidhje me faktin nëse gjykata do të vendos nëse do të marrë shoqërimin dhe kujdesin e shtetasit Aleksandër Kuqo pranë mjekut familjar. Avokati mbrojtës ka kërkuar në seancë se paraprakisht duhet të vendoset një njeri i afërt që në rastin konkret është bashkëshortja e tij, Ledia Kuqo, dhe për këtë marrin përsipër njoftimin e saj. Gjykata vendosi të ndërpresë shqyrtimin gjyqësor me qëllim paraqitjen e shtetases Ledia Kuqo. n.k/Fjala.al/
