Policia e Lushnjës ka gjobitur një biznesmen, pasi mbante hapur lokalin jashtë fashës orare, si dhe shtatë qytetarë që ndodheshin në lokal.
Policia njofton se ka gjobitur me masë administrative 1.000.000 lekë pronari i lokalit dhe me masë 10.000 lekë shtatë klientë që ndodheshin në lokal.
Njoftimi i policisë:
Gjatë mbrëmjes së djeshme, në Ardenicë, Lushnjë, shërbimet e Komisariatit të Policisë Lushnjë kanë konstatuar të hapur jashtë fashës orare lokalin në pronësi të shtetasit A. D.
Nga shërbimet e Policisë, në bazë të Aktit Normativ Nr. 3, datë 15.03.2020, është vendosur masa administrative 1.000.000 lekë për pronarin e lokalit, shtetasin A. D dhe është vendosur masa administrative 10.000 lekë për shtatë klientët që ishin në lokal.
Drejtoria Vendore e Policisë Fier apelon për të gjithë administratorët e lokaleve dhe qytetarët që të respektojnë masat anticovid dhe orarin e përcaktuar për ushtrimin e aktivitetit.
