Komentet e qytetarëve janë të panumërta kur kërkojnë që “Operacioni Forca e Ligjit” të tregojë besueshmëri, duhet të godasë edhe politikanët e korruptuar. Pyetja përse OFL u përqëndrua vetëm te krimi i organizuar dhe jo te politikanët e korruptuar, iu shtrua në emisionin “Open” ministrit të Brendshëm, Sandër Lleshaj.
Lleshaj theksoi se Ministria e Brendshme dhe Policia e Shtetit nuk kanë në fokus korrupsionin, pasi kjo çështje duhet të trajtohet nga SPAK-u. Por insistimit të analistit Neritan Sejamini se SPAK ka në fokus edhe krimin e organizuar dhe pavarësisht kësaj Qeveria krijoi OFL-në, ministri Lleshaj nuk i dha një përgjigje të qartë.
“Nëse politikani është në kushte të njëjta si Lul berisha, atëherë duhet t’i shkojë formulari. Por si mund të futet vepra e korrupsionit? Targeti i këtij ligji është krimi i organizuar. Ne nuk e konsiderojmë çështjen e korrupsionit përsa kohë është krijuar SPAK. SPAK duhet të luftojë edhe korrupsionin edhe krimin e organizuar. Antikçk rregullon vetëm një aspekt… E kemi të ngritur strukturën për korrupsionin (SPAK-un)”, tha Lleshaj.
Sejamini insistoi duke sjellë rastin e Saimir Tahirit, ish-ministër i Brendshëm, që është dënuar për “shpërdorim detyre”, por OFL nuk mund të shkojë dhe t’i dërgojë për plotësim formularin e pasurisë.
